દુર્ઘટના@આણંદ: નશામાં ધૂત ટેન્કર ચાલકે 49 વર્ષીય બાઇકચાલકનો ભોગ લીધો
અટલ સમાચાર ડોટ કોમ, ડેસ્ક
આણંદ જિલ્લામાંથી એક અત્યંત હૃદયદ્રાવક અને કમકમાટીભરી અકસ્માતની ઘટના સામે આવી છે. આણંદના તારાપુર મોટી ચોકડી પર નશામાં ધૂત એક ટેન્કર ચાલકે સ્ટીયરિંગ પરથી કાબૂ ગુમાવતા ભયાનક ટ્રિપલ અકસ્માત સર્જ્યો હતો. બેફામ ગતિએ આવી રહેલા આ કાળમુખા ટેન્કરે રસ્તા પર પસાર થઈ રહેલા એક આઇશર અને બાઇકને જોરદાર ટક્કર મારી હતી.આ ટક્કર એટલી પ્રચંડ હતી કે બાઇક પર સવાર 49 વર્ષીય બાઇકચાલકનું ઘટનાસ્થળે જ કમકમાટીભર્યું મોત નીપજ્યું હતું, જેના પગલે સમગ્ર પંથકમાં શોક અને આક્રોશની લાગણી ફેલાઈ ગઈ છે.
આ ભયાનક અકસ્માતની લપેટમાં માત્ર વાહનો જ નહીં પરંતુ રસ્તા પર ચાલી રહેલા નિર્દોષ નાગરિકો પણ આવી ગયા હતા. ટેન્કરની ટક્કરથી પતિ-પત્ની સહિત બે લોકોને અત્યંત ગંભીર ઇજાઓ પહોંચી છે, જ્યારે રસ્તા પરથી પસાર થઈ રહેલા ત્રણ રાહદારીઓને પણ ટેન્કરે અડફેટે લેતા તેઓ પણ લોહીલુહાણ હાલતમાં ફંગોળાયા હતા. અકસ્માત સર્જાતા જ આસપાસના સ્થાનિક લોકો અને વાહનચાલકો તાત્કાલિક મદદ માટે દોડી આવ્યા હતા અને 108 એમ્બ્યુલન્સ મારફતે તમામ ઇજાગ્રસ્તોને તાત્કાલિક સારવાર અર્થે નજીકની હોસ્પિટલમાં ખસેડવામાં આવ્યા હતા.ઘટનાની જાણ થતાં જ સ્થાનિક પોલીસ કાફલો તાત્કાલિક તારાપુર મોટી ચોકડી ખાતે દોડી ગયો હતો અને ટ્રાફિક હળવો કરી અકસ્માતગ્રસ્ત વાહનોને રસ્તા પરથી ખસેડવાની કામગીરી હાથ ધરી હતી. પોલીસે નશામાં ધૂત ટેન્કર ચાલક વિરુદ્ધ ગુનો નોંધીને આગળની કાયદેસરની તપાસ તેજ કરી છે. દારૂ પીને વાહન ચલાવતા આવા બેજવાબદાર ચાલકોના કારણે નિર્દોષ લોકોના જીવ જોખમાઈ રહ્યા છે.

