દુર્ઘટના@બનાસકાંઠા: આખલા સાથે કાર અથડાતાં ભયાનક અકસ્માત, 2 યુવાનોનો કમકમાટીભર્યા મોત

અટલ સમાચાર ડોટ કોમ, ડેસ્ક

બનાસકાંઠાના વાવ-થરાદ પંથકમાં રખડતા પશુઓનો ત્રાસ હવે જીવલેણ સાબિત થઈ રહ્યો છે. ગત મોડી રાત્રે ભારતમાલા હાઇવે પર પૂરઝડપે દોડી રહેલી કરોડો રૂપિયાની કિંમતી રેન્જ રોવર કાર અચાનક વચ્ચે આવી ગયેલા એક આખલા સાથે ધડાકાભેર અથડાતા દુર્ઘટના સર્જાઈ હતી.ટક્કર એટલી ભીષણ હતી કે લક્ઝુરિયસ કારના આગળના ભાગનો સંપૂર્ણ ભુક્કો બોલી ગયો હતો, જે હાઇવે પર રાત્રે મુસાફરી કરતા વાહનચાલકોની સુરક્ષા સામે ગંભીર સવાલો ખડા કરે છે.

આ ભયાનક અકસ્માતના અવાજથી આસપાસના લોકો તાત્કાલિક ઘટનાસ્થળે દોડી આવ્યા હતા અને પોલીસને જાણ કરી હતી. અકસ્માત એટલો ગંભીર હતો કે કારમાં સવાર બે યુવકોના ઘટનાસ્થળે જ કમકમાટીભર્યા મોત નીપજ્યા હતા, જ્યારે અન્ય એક વ્યક્તિને ગંભીર ઈજાઓ પહોંચી હતી. માહિતી મળતા જ પોલીસ અને 108 એમ્બ્યુલન્સની ટીમ તાત્કાલિક કાફલા સાથે પહોંચી હતી. ઈજાગ્રસ્ત વ્યક્તિને ત્વરિત સારવાર અર્થે નજીકની સરકારી હોસ્પિટલ ખસેડવામાં આવ્યા છે, જ્યારે મૃતકોના શબને પોસ્ટમોર્ટમ અર્થે મોકલી પોલીસે આગળની કાયદેસરની કાર્યવાહી હાથ ધરી છે.

એક તરફ સરકાર અને તંત્ર દ્વારા હાઇવે સેફ્ટી અને સુરક્ષિત મુસાફરીના મોટા-મોટા દાવા કરવામાં આવે છે, પરંતુ જમીની વાસ્તવિકતા કંઈક અલગ જ છે. હાઇવે પર અડિંગો જમાવીને બેસતા રખડતા પશુઓ અજાણ્યા વાહનચાલકો માટે મોતનું નિમંત્રણ સાબિત થઈ રહ્યા છે. અગાઉ પણ અનેક જીવલેણ અકસ્માતો સર્જાયા હોવા છતાં તંત્ર દ્વારા આખલા અને પશુઓને હાઇવે પરથી હટાવવા માટે કોઈ નક્કર કામગીરી કરવામાં આવી નથી. આ દુર્ઘટના બાદ સ્થાનિક રહીશો અને વાહનચાલકોમાં ભારે રોષ જોવા મળી રહ્યો છે.