કાર્યવાહી@અમદાવાદ: એરપોર્ટ પરથી ફરી 2.35 કરોડનું 3 કિલો દાણચોરીનું સોનું ઝડપાયું

અટલ સમાચાર ડોટ કોમ, ડેસ્ક

અમદાવાદ ઈન્ટરનેશનલ એરપોર્ટ પરથી ડીઆરઆઈની ટીમે 2.35 કરોડનું 3 કિલો દાણચોરીનું સોનુ ઝડપ્યું છે. બેંગકોકથી આવેલા મુસાફરે મીની એર કોમ્પ્રેસરમાં સોનુ છુપાવ્યું હતું.બાતમીને આધારે ટીમે મુસાફરને ઝડપી લઈ દાણચોરીનું સોનુ કબજે લીધુ હતું. ઉલ્લેખનીય છે કે ચાલુ વર્ષે ડીઆરઆઈના અધિકારીઓએ સુરત અને અમદાવાદ એરપોર્ટ પરથી 66 કરોડનું 93 કિલો દાણચોરીનું સોનુ ઝડપી લીધુ છે.

અમદાવાદ ડીઆરઆઈની ટીમને બાતમી મળી હતી કે, બેંગકોકથી એક ભારતીય નાગરિક દાણચોરીનું સોનુ લઈને આવી રહ્યો છે.આ મુસાફર પોતાની સાથે બે મીની કોમ્પ્રેસરના પિસ્ટનમાં છુપાવીને સોનુ લાવી રહ્યો છે. ફલાઈટ ઉતરતાં જ અધિકારીઓએ મુસાફરને અલગ તારવી તેની પૂછપરછ કરી હતી. જોકે તેણે કોઈ કબૂલાત કરી નહોતી. તેનો સામાન ચેક કરતા તેની પાસેથી દાણચોરીનું સોનુ મળી આવ્યું હતું.ડીઆરઆઈએ આ સોનુ કબજે લઈ તે કોના માટે સોનુ લાવ્યો છે તેની તપાસ શરૂ કરી છે. અધિકારીઓના જણાવ્યા મુજબ 2024માં ડીઆરઆઈ દ્વારા અમદાવાદ અને સુરત ઈન્ટરનેશનલ એરપોર્ટ પરથી 66 કરોડનું 93 કિલો દાણચોરીનું સોનું ઝડપી લીધું છે.