કાર્યવાહી@અમદાવાદ: ફ્લાઈટમાં આવીને મોબાઈલ ચોરી કરતી આંતરરાજ્ય ગેંગનો પર્દાફાશ

અટલ સમાચાર ડોટ કોમ, ડેસ્ક

અમદાવાદ પોલીસે મોબાઈલ ચોરી કરતી એક આંતરરાજ્ય ગેંગને ઝડપી પાડીને ચોંકાવનારો ઘટસ્ફોટ કર્યો છે. ઝોન 3 LCB દ્વારા ઝારખંડની આ ગેંગના બે મુખ્ય સભ્યો રઘુ મહતો અને વિક્રમ મહતોની ધરપકડ કરવામાં આવી છે. આ ગેંગની કામ કરવાની પદ્ધતિ સાંભળીને પોલીસ પણ ચોંકી ઉઠી હતી. આ આરોપીઓ એટલા હાઈ-પ્રોફાઈલ હતા કે ચોરી કરવા માટે તેઓ ફ્લાઈટમાં મુસાફરી કરતા હતા.

તેઓ મુખ્યત્વે ક્રિકેટ સ્ટેડિયમ, રેલવે સ્ટેશન, બસ સ્ટેશન અને ભીડભાડવાળા મેળાના સ્થળોને ટાર્ગેટ બનાવતા હતા. સૌથી ચોંકાવનારી વાત એ છે કે, ચોરી કરવા માટે તેઓ સગીર બાળકોનો ઉપયોગ કરતા હતા. તકનીકી કૌશલ્યનો દુરુપયોગપોલીસ પકડથી બચવા માટે આ ગેંગ અદ્યતન તરકીબો અપનાવતી હતી. ચોરી કરેલા મોબાઈલ ટ્રેસ ન થાય તે માટે તેઓ તેના પર સિલ્વર ફોઈલ લગાવી દેતા, જેથી મોબાઈલનું સિગ્નલ બ્લોક થઈ જાય. ત્યારબાદ આ મોબાઈલને અન્ય રાજ્યોમાં વેચી દેવામાં આવતા હતા. પોલીસે આરોપીઓ પાસેથી 6 લાખથી વધુની કિંમતના 21 ચોરીના મોબાઈલ રિકવર કર્યા છે. આ ધરપકડ સાથે જ ગુજરાતમાં નોંધાયેલા 12 ગુનાઓનો ભેદ ઉકેલાયો છે. હાલ પોલીસ આ ગેંગ સાથે જોડાયેલા અન્ય સભ્યો અને સગીરોની સંડોવણી અંગે સઘન તપાસ કરી રહી છે.