કાર્યવાહી@પાટણ: મંદિરોને ટાર્ગેટ કરતી કુખ્યાત ચોર ગેંગ ઝડપાઈ, 3 જિલ્લામાં ફેલાયેલું હતું નેટવર્ક

અટલ સમાચાર ડોટ કોમ, ડેસ્ક

ધાર્મિક સ્થળોને નિશાન બનાવીને ચોરીની ઘટનાઓને અંજામ આપતી એક કુખ્યાત ચોર ગેંગ આખરે પાટણ LCB પોલીસના સકંજામાં આવી ગઈ છે. પાટણ LCB પોલીસને મળેલી બાતમીના આધારે સિદ્ધપુર તાલુકાના કલ્યાણા ગામની આ કુખ્યાત ચોર ગેંગનો પર્દાફાશ થયો છે. સરસ્વતી તાલુકાના ભૂતિયા વાસણા ગામમાં આવેલ મંદિરમાં ચોરીની ફરિયાદ નોંધાતા પોલીસે તાત્કાલિક ધોરણે ચક્રો ગતિમાન કર્યા હતા અને આ સફળતા મેળવી હતી.

પોલીસ તપાસમાં સામે આવ્યું છે કે, કલ્યાણા ગામના 4 ચોરોની આ ગેંગ અત્યંત ચાલાકીથી કામ કરતી હતી. આ ગેંગના ઇસમો વિવિધ મંદિરોમાં સામાન્ય દર્શનાર્થી કે શ્રદ્ધાળુ બનીને પ્રસાદ ચડાવવાના બહાને જતા હતા. મંદિરમાં કોઈ ન હોય કે સુમસામ વાતાવરણ હોય ત્યારે ચોક્કસ રેકી કરીને ભગવાનને ચઢાવવામાં આવેલા સોના-ચાંદીના કિંમતી દાગીનાઓની ચોરી કરી પલાયન થઈ જતા હતા. આ ગેંગે માત્ર છેલ્લા 1 મહિનાના ટૂંકા ગાળામાં જ આશરે 22 જેટલા મંદિરોને નિશાન બનાવ્યા હતા.આ કુખ્યાત ચોર ગેંગ દ્વારા પાટણ, મહેસાણા તેમજ બનાસકાંઠા એમ કુલ 3 જિલ્લાઓમાં ચોરીનો આતંક મચાવ્યો હતો. આ અલગ-અલગ 22 મંદિરોમાં ચોરીના ગુના આચરવામાં આવ્યા હોવા છતાં, અગાઉ માત્ર પાટણના સરસ્વતી તાલુકા પોલીસ સ્ટેશન તેમજ બનાસકાંઠાના ગઢ પોલીસ સ્ટેશનમાં જ પોલીસ ફરિયાદો નોંધાઈ હતી. બાકીના સ્થળોએ પણ ગુનાઓ દાખલ હોવાની કે તપાસ થવાની શક્યતાઓ છે.

પાટણ LCB પોલીસે બાતમીના આધારે કલ્યાણા ગામના 4 ઇસમોની અટકાયત કરી લીધી છે. પોલીસે આ ગેંગ પાસેથી ચોરી કરાયેલા સોના-ચાંદીના દાગીના ઉપરાંત ગુનામાં વપરાતી રીક્ષા અને ઇકો કાર સહિત કુલ રૂ. 6,70,000 નો મુદ્દામાલ કબ્જે કર્યો છે.