કાર્યવાહી@સુરત: અબ્રામા વિસ્તારમાં શંકાસ્પદ નકલી ઘી બનાવતી ફેક્ટરીનો પર્દાફાશ, 3 ઝડપાયા

અટલ સમાચાર ડોટ કોમ, ડેસ્ક

દિવાળીના તહેવારો પહેલાં સુરતના અબ્રામા વિસ્તારમાં શંકાસ્પદ નકલી ઘી બનાવતી ફેક્ટરીનો પર્દાફાશ થયો છે. અબ્રામા રોડ પર આવેલા માધવ કેમ્પસના ગોડાઉન નંબર-18માં ઉત્રાણ પોલીસ અને ફૂડ સેફ્ટી વિભાગે સંયુક્ત દરોડા પાડીને શંકાસ્પદ ઘીનો મોટો જથ્થો જપ્ત કર્યો છે. પ્રાથમિક તપાસમાં સોયાબીન તેલ, વનસ્પતિ ઘી અને ફ્લેવર્ડનો ઉપયોગ કરીને શુદ્ધ ઘીના નામે ઉત્પાદન કરવામાં આવતું હોવાની વિગતો સામે આવી છે.પોલીસને મળેલી બાતમીના આધારે માધવ કેમ્પસના ગોડાઉનમાં દરોડો પાડવામાં આવ્યો હતો.

ફૂડ સેફ્ટી અધિકારીઓની હાજરીમાં હાથ ધરાયેલી તપાસ દરમિયાન સ્થળ પરથી શંકાસ્પદ ઘી, વનસ્પતિ ડાલડા ઘી, સોયાબીન તેલ અને ઘી બનાવવામાં વપરાતાં મશીનો મળી આવ્યાં હતાં. પ્રાથમિક વિગતો મુજબ, તેલ અને ફ્લેવર્ડનો ઉપયોગ કરીને તૈયાર કરાતું શંકાસ્પદ ઘી શુદ્ધ ઘીના નામે મહારાષ્ટ્રમાં સપ્લાય કરવામાં આવતું હોવાની આશંકા છે. જપ્ત કરાયેલા ઘીની ગુણવત્તા અને તેમાં ભેળસેળ થઈ છે કે નહીં તે અંગેનો અંતિમ ખુલાસો લેબોરેટરીના રિપોર્ટ બાદ થશે.આ કેસમાં સન્ની કલ્પેશભાઈ મોદી, કિશનભાઈ મનોજભાઈ મોદી અને કલ્પેશભાઈ સુંદરલાલ મોદી સામે પોલીસે કાર્યવાહી કરી છે. ત્રણેય આરોપીઓ મૂળ બનાસકાંઠા જિલ્લાના ડીસાના વતની હોવાનું અને હાલ સુરતના અમરોલી વિસ્તારમાં રહેતા હોવાનું સામે આવ્યું છે. પોલીસે સ્થળ પરથી જપ્ત કરાયેલા ઘીના નમૂના તપાસ માટે લેબોરેટરીમાં મોકલ્યા છે. લેબોરેટરીનો રિપોર્ટ આવ્યા બાદ ઘીની ગુણવત્તા, ભેળસેળની હકીકત અને અન્ય પાસાં અંગે વધુ કાર્યવાહી કરવામાં આવશે.

નવરાત્રી અને દિવાળીના તહેવારો દરમિયાન ઘી સહિતની ખાદ્ય વસ્તુઓની માગ વધતી હોય છે. આવા સમયે શુદ્ધ ઘીના નામે શંકાસ્પદ ઉત્પાદનનું વેચાણ થાય તો ગ્રાહકોના આરોગ્ય સામે જોખમ ઊભું થઈ શકે છે. આથી પોલીસ અને ફૂડ સેફ્ટી વિભાગની કાર્યવાહી મહત્ત્વપૂર્ણ બની છે. જપ્ત કરાયેલા જથ્થાની માત્રા અને મુદ્દામાલની કુલ કિંમત અંગે પ્રાથમિક વિગતોમાં તફાવત જોવા મળે છે. એક માહિતી મુજબ 26 કિલોથી વધુ ઘી અને રૂ.12 લાખથી વધુનો મુદ્દામાલ જપ્ત કરાયો છે, જ્યારે અન્ય વિગતો મુજબ 1,694 કિલો શંકાસ્પદ ઘી સહિત કુલ રૂ.18 લાખનો મુદ્દામાલ સીઝ કરવામાં આવ્યો છે.