કાર્યવાહી@મહેસાણા: પુરવઠા વિભાગના નાયબ મામલતદાર રૂપિયા 10,000ની લાંચ લેતા ઝડપાયા

અટલ સમાચાર ડોટ કોમ, ડેસ્ક

મહેસાણા જિલ્લાના ખેરાલુમાં પુરવઠા વિભાગના નાયબ મામલતદાર ડી. કે. મહેતા રૂપિયા 10,000 ની લાંચ લેતા એસીબી દ્વારા ઝડપી લેવામાં આવ્યા છે. આ કાર્યવાહી એસીબીની ટીમ દ્વારા ગોઠવવામાં આવેલા છટકામાં કરવામાં આવી હતી.સહકારી મંડળીના સંચાલકની ફરિયાદ પર આ કાર્યવાહી શરૂ કરવામાં આવી હતી. નાયબ મામલતદાર મહેતાને દંડની પરેશાની દૂર કરવા અને જરૂરી પુરૂવઠા પ્રમાણપત્ર આપવા માટે લાંચની માંગણી કરી હતી. એસીબી દ્વારા કાર્યવાહી કરતા ખેરાલુ પુરવઠા મામલતદાર કચેરીમાં રેડ કરવામાં આવી હતી, જે કારણે કર્મચારીઓમાં સન્નાટો ફેલાઇ ગયો.

આ ક્રમમાં નાયબ મામલતદારને લાંચ લેતા પકડવામાં આવ્યા અને તેમની સામે કેસ રજીસ્ટર કરવામાં આવ્યો છે. આ કાર્યવાહીથી ખેરાલુ અને આસપાસના વિસ્તારોમાં ભ્રષ્ટાચાર સામે કડક નીતિ અમલમાં મુકવાની જરૂરિયાતને મહત્વ આપતો સંકેત આપવામાં આવ્યો છે. અત્યારે ભ્રષ્ટાચાર તેની ચરમ સીમાએ પહોંચી ગયો છે. ખાસ કરીને વાત કરવામાં આવે તો, અત્યારે પૈસા વગર કોઈ કામ થતું જ નથી, સરકારી અધિકારીઓ માત્ર પૈસા માટે જ કામ કરતા હોય એવા અનેક કિસ્સાઓ સામે આવ્યાં છે. ખેરાલુમાં પણ નાયબ મામલતદાર પુરવઠા લાંચ લેતા રંગે હાથે પકડાયા છે. અત્યારે મહેસાણા એસીબીએ આ નાયબ મામલતદાર સામે કાયદેસરની કાર્યવાહી હાથ ધરી દીધી છે.