કાર્યવાહી@સુરેન્દ્રનગર: લખતર ગ્રામ પંચાયત ખાતે ફરજ બજાવતા તલાટી રૂ.3000ની લાંચ લેતા ઝડપાયા

અટલ સમાચાર ડોટ કોમ, ડેસ્ક

લખતર ગ્રામ પંચાયત ખાતે ફરજ બજાવતા તલાટી કમ મંત્રી ધર્મેશકુમાર તળશીભાઈ પેઢડીયા અને પ્રજાજન રાજુભાઈ રામજીભાઈ વસોયા રૂ.3000ની લાંચ લેતા ઝડપાયા છે. ફરીયાદીના વઢવાણ તાલુકાના વડોદ ગામે બે પ્લોટ આવેલા હોય જે બન્ને પ્લોટના ગામ નમુના નંબર-૨ નો ઉતારો લખતર ગ્રામ પંચાયત તલાટી ધર્મેશકુમાર તળશીભાઈ પેઢડીયા પાસે માંગતા તલાટીએ ફરીયાદી પાસે પ્રજાજન રાજુભાઇ રામજીભાઇ વસોયા મારફતે રૂ.3000નો વહીવટ કરવો પડશે તેમ કહી ગેરકાયદેસર લાંચની માંગણી કરી રાજુભાઇ વસોયાને આપી દેવા જણાવ્યું હતું.

ફરિયાદી લાંચની રકમ આપવા માંગતા ન હોય સુરેન્દ્રનગર એ.સી.બી.નો સંપર્ક કરી ફરિયાદ આપતા ફરીયાદ આધારે ગોઠવેલ લાંચના છટકા દરમ્યાન રાજુભાઇ વસોયાએ ફરીયાદી સાથે હેતુલક્ષી વાતચીત કરી ગેર-કાયદેસર લાંચના નાણાં રૂ.3000 સ્વીકારી લાંચીયા તલાટી ધર્મેશકુમાર તળશીભાઈ પેઢડીયા તથા રાજુભાઇ વસોયાએ એકબીજાને મદદગારી કરતા પકડાઇ ગયા હતા. સમગ્ર મામલે એસીબીએ ગુન્હો નોંધી અટકાયત કરી કાયદેસરની કાર્યવાહી હાથધરી છે.