કાર્યવાહી@ગુજરાત: શામળાજીમાંથી 1 કરોડની રોકડ ભરેલી કાર સાથે ડ્રાઈવર ઝડપાયો

અટલ સમાચાર ડોટ કોમ, ડેસ્ક

લોકસભાની ચૂંટણી પહેલા રાજસ્થાનથી ગુજરાતમાં આવી રહેલી કારમાં શામળાજીમાંથી રૂ.1 કરોડની રોકડ જપ્ત કરવામાં આવી છે. શામળાજી પોલીસે કારના ગુપ્ત કમ્પાર્ટમેન્ટમાં છુપાવવામાં આવેલ રૂ.1 કરોડનો જથ્થો જપ્ત કર્યો હતો. પૈસા કબજે કર્યા બાદ પોલીસે કાર ચાલકની અટકાયત કરી પૂછપરછ હાથ ધરી છે.

લોકસભાની ચૂંટણીને કારણે સરહદી જિલ્લાની પોલીસ હવે દારૂ અને રોકડ સહિતની કિંમતી ચીજવસ્તુઓની ગેરરીતિ સામે સતર્ક છે.દરમિયાન અરવલ્લીની શામળાજી પોલીસે 1 કરોડના જથ્થા સાથે કાર કબજે કરી છે. કારમાં સિક્રેટ બોક્સ બનાવીને છુપાવીને એક કરોડ રૂપિયા લાવવામાં આવી રહ્યા હતા. વાહન ચેકિંગ દરમિયાન જ્યારે એક શંકાસ્પદ કાર અંસોલ નજીક ચેકપોસ્ટ પરથી પસાર થતી જોવા મળી ત્યારે પોલીસે તેને રોકી હતી.

કારની તલાશી દરમિયાન ગુપ્ત કમ્પાર્ટમેન્ટમાં છુપાયેલ 21 બંડલમાં રાખવામાં આવેલ 1 કરોડ રૂપિયાની રકમ જપ્ત કરવામાં આવી હતી. પોલીસે કાર ચાલક પર્વતસિંહ શંભુસિંહ રાજપૂતની અટકાયત કરી છે. એએસપી સંજય કેશવાલાએ જણાવ્યું હતું કે, કાર ચાલક રાજસ્થાનના બીલુકા ઘોડા, તા. સલુમ્બરનો રહેવાસી છે.