અમદાવાદઃ પતિએ મંદીનું કારણ ધરી પત્નિના દાગીના વેચ્યા, મામલો પોલીસ સ્ટેશનમાં

અટલ સમાચાર, ડેસ્ક

શહેરના કૃષ્ણનગર પોલીસ સ્ટેશનમાં પત્નીએ જ પતિ સામે ફરિયાદ નોંધાવી છે. પત્નીએ આક્ષેપ કર્યો છે કે, મંદીનું બહાનું કરી પતિએ તેના દાગીના વેચી નાખ્યા હતા અને લોન પણ લીધી હતી. આ ઉપરાંત પિયરમાંથી રૂપિયા લાવવાનું કહીને પતિ તેને ત્રાસ આપતો હતો.

કૃષ્ણનગરમાં રહેતી અમીતાબેન સાંગાણીના લગ્ન શૈલેષ સાથે થયા હતા. અમીતાબેનના આ ત્રીજા લગ્ન હતા. તેનો પતિ શૈલેષ એમ્બ્રોઇડરીનું જોબવર્ક કરે છે. હાલ તમામ ક્ષેત્રોમાં મંદી હોવાથી શૈલેષને પણ ધંધામાં મંદી આવી હતી. આથી શૈલેષે તેમની પત્નીના દાગીના વેચી નાખ્યા હતા.

આ રૂપિયાથી પણ મંદીની મોકાણમાંથી બહાર ન નીકળતા તેણે પત્ની પાસે ત્રણ લાખની લોન લેવડાવી હતી. જોકે, પતિએ હપ્તા ભર્યા ન હતા અને પત્નીને હપ્તા ભરવાનું કહીને માર મારીને ત્રાસ ગુજાર્યો હતો.

આ મામલે અમીતાબેને કંટાળીને પતિ સામે જ કૃષ્ણનગર પોલીસ સ્ટેશનમાં ફરિયાદ નોંધાવી હતી.