બ્રેકિંગ@દેશ: NEET UG રી-એક્ઝામને લઈને NTAનો દેશભરના પરીક્ષા કેન્દ્રો પર મૉક ડ્રિલ યોજવાનો નિર્ણય

અટલ સમાચાર ડોટ કોમ, ડેસ્ક

NEET-UG રી-એક્ઝામને સંપૂર્ણપણે સુરક્ષિત અને પારદર્શક બનાવવા માટે નેશનલ ટેસ્ટિંગ એજન્સી દ્વારા વ્યાપક તૈયારીઓ કરવામાં આવી રહી છે. પરીક્ષા પહેલા દેશભરના તમામ કેન્દ્રો પર મૉક ડ્રિલ યોજવામાં આવી રહી છે, જેથી પરીક્ષા દરમિયાન કોઈ પણ પ્રકારની ખામી અથવા ગડબડ ન સર્જાય. NEET-UG રી-એક્ઝામ 21 જૂને યોજાવાની છે. તેના એક દિવસ પહેલાં NTA દ્વારા દેશવ્યાપી મૉક ડ્રિલનું આયોજન કરવામાં આવ્યું છે.

આ પ્રક્રિયા સવારે 9 વાગ્યાથી રાત્રે 8 વાગ્યા સુધી ચાલશે. પરીક્ષામાં 22.79 લાખથી વધુ ઉમેદવારો ભાગ લેવાના હોવાથી સુરક્ષા અને વ્યવસ્થાપન પર વિશેષ ભાર મૂકવામાં આવ્યો છે. NTAના જણાવ્યા અનુસાર, પરીક્ષા સામગ્રીને સુરક્ષિત રીતે પરીક્ષા કેન્દ્રો સુધી પહોંચાડવાની જવાબદારી જિલ્લા વહીવટીતંત્ર, પોલીસ અને વિશેષ એસ્કોર્ટ ટીમોને સોંપવામાં આવી છે. આ વર્ષે ભારતના 551 શહેરો અને વિદેશના 14 શહેરોમાં 5,000થી વધુ પરીક્ષા કેન્દ્રો બનાવવામાં આવ્યા છે. તમામ કેન્દ્રોને હાઈ-સિક્યોરિટી ઝોન જાહેર કરવામાં આવ્યા છે. અત્યાર સુધીમાં 18.5 લાખથી વધુ વિદ્યાર્થીઓએ પોતાના એડમિટ કાર્ડ ડાઉનલોડ કરી લીધા છે, જ્યારે લગભગ 3.5 લાખ ઉમેદવારોએ પરીક્ષા શહેર અથવા કેન્દ્ર બદલવાનો વિકલ્પ પસંદ કર્યો છે.

પરીક્ષાનું સંચાલન સુનિશ્ચિત કરવા માટે 2 લાખથી વધુ કર્મચારીઓ, 674 સિટી કો-ઓર્ડિનેટર અને 6,669 ઓબ્ઝર્વર તૈનાત કરવામાં આવ્યા છે. સુરક્ષા વ્યવસ્થામાં 2 લાખથી વધુ પોલીસકર્મીઓ જોડાશે. ઉપરાંત પ્રશ્નપત્રો અને OMR શીટના સુરક્ષિત પરિવહન માટે 15,000 અર્ધલશ્કરી દળના જવાનોની નિમણૂક કરવામાં આવી છે.પરીક્ષા કેન્દ્રો પર વધારાના 1.5 લાખ CCTV કેમેરા લગાવવામાં આવ્યા છે અને 15,000 સિગ્નલ જામર પણ સ્થાપિત કરાયા છે, જેથી કોઈ પણ પ્રકારની ઇલેક્ટ્રોનિક છેતરપિંડી અટકાવી શકાય. તમામ કેન્દ્રોની દેખરેખ NTAના મુખ્ય મથક અને કેન્દ્રીય કંટ્રોલ રૂમમાંથી રિયલ-ટાઈમમાં કરવામાં આવશે.પરીક્ષા બપોરે 2 વાગ્યાથી સાંજે 5:15 વાગ્યા સુધી પેન-એન્ડ-પેપર મોડમાં લેવામાં આવશે. દિવ્યાંગ અને વિશેષ શ્રેણીના ઉમેદવારોને વધારાનો સમય આપવામાં આવશે અને તેઓ સાંજે 6:20 વાગ્યા સુધી પરીક્ષા આપી શકશે.