બ્રેકીંગ@રાજકોટ: અગ્નિકાંડને લઈ સૌથી મોટા સમાચાર, મનપાના 4 અધિકારીઓ સકંજામાં

અટલ સમાચાર ડોટ કોમ, ડેસ્ક

ટીઆરપી ગેમિંગ ઝોનમાં ગત સપ્તાહ લાગેલી ભિષણ આગ મામલે એક ટાઉન પ્લાનિંગ ઓફિસર સહિત ચાર સરકારી અધિકારીઓની ધરપકડ કરવામાં આવી છે. અગ્નિકાંડમાં 27 લોકોના મોત થયા હતા. તેમાં મોટી સંખ્યામાં બાળકો પણ સામેલ હતા. રાજકોટ અગ્નિકાંડ અંગે એક અધિકારીએ જણાવ્યું હતું કે, ટાઉન પ્લાનિંગ ઓફિસર એમડી સાગઠિયા, આસિસ્ટન્ટ ટાઉન પ્લાનિંગ ઓફિસર મુકેશ મકવાણા, ગૌતમ જોશી અને કાલાવડ રોડ ફાયર સ્ટેશનના પૂર્વ સ્ટેશન ઓફિસર રોહિત વિગોરાની ધરપકડ કરવામાં આવી છે. રાજ્યના પોલીસ મહાનિર્દેશક વિકાસ સહાયે ચાર સરકારી અધિકારીઓની ધરપકડની પુષ્ટિ કરી છે. જોશી અને વિગોરાને સરકારે પહેલા જ સસ્પેન્ડ કરી દીધા હતા.આ કેસમાં અત્યાર સુધીમાં લગભગ નવ લોકોની ધરપકડ કરવામાં આવી છે.

આગની ઘટના બાદ તત્કાલિન પોલીસ કમિશનર રાજુ ભાર્ગવ સહિત ત્રણ આઈપીએસ અધિકારીઓની બદલી કરવામાં આવી હતી. આ ઘટનાની તપાસ માટે રચાયેલા SITના વડા અને વરિષ્ઠ IPS અધિકારી સુભાષ ત્રિવેદીએ ગાંધીનગરમાં રાજ્ય પોલીસ હેડક્વાર્ટરમાં પૂર્વ ફાયર ઓફિસર આઈવી ખેરની લગભગ ત્રણ કલાક પૂછપરછ કરી હતી.સોમવારના રોજ ગુજરાત હાઈકોર્ટે આ મામલે રાજકોટ મહાનગરપાલિકાને આકરી ઝાટકણી કાઢી હતી અને જણાવ્યું હતું કે, નિર્દોષ લોકોના જીવ ગુમાવ્યા બાદ જ પગલાં લેતી રાજ્યની તંત્ર પર તેને વિશ્વાસ નથી.

ગુજરાત હાઈકોર્ટે મ્યુનિસિપલ કોર્પોરેશનને પૂછ્યું હતું કે, શું તેણે તેની આસપાસ આટલા વિશાળ બાંધકામ તરફ આંખ આડા કાન કર્યા છે. આ ઘટનામાં ચાર ભાગીદારો અને TRP ગેમિંગ ઝોનના મેનેજરની ધરપકડ કરવામાં આવી છે.જ્યારે ઘટના સમયે ગેમિંગ ઝોનમાં મુખ્ય ભાગીદાર હાજર હતો. આગ લાગવાથી તેનું મોત થયું છે. આ અગાઉ રાજકોટ પોલીસે તેને આરોપી પણ બનાવ્યો હતો, પરંતુ ડીએનએ ટેસ્ટે તેના મૃત્યુની પુષ્ટિ કરી છે.રાજકોટમાં જે ગેમિંગ ઝોન બળીને રાખ થઈ ગયો હતો, તેમાં ઘણી ખામીઓ હતી. આ આગની ઘટનાની તપાસ કરી રહેલી SITએ આવી ઘણી ખામીઓ શોધી કાઢી છે. આ મામલે પોલીસ, ફાયર વિભાગ અને પાલિકાની બેદરકારી સામે આવી છે.