બ્રેકીંગ@રાજસ્થાન: ગુજરાતના આ પાડોશી રાજ્યમાં 2 દિવસ નહીં મળે પેટ્રોલ-ડીઝલ, જાણો વિગતે

અટલ સમાચાર ડોટ કોમ, ડેસ્ક

રાજસ્થાનમાં આવનારા બે દિવસ ખૂબ જ મુશ્કેલ છે. સ્ટેટ પેટ્રોલ પંપ એસોસિએશને હડતાળનું એલાન આપ્યું છે. રાજ્યના પેટ્રોલ પંપ આગામી બે દિવસ સુધી બંધ રહેશે. આ હડતાલ 10 માર્ચ, રવિવારે સવારે 6 વાગ્યાથી શરૂ કરવામાં આવી છે. આગામી 48 કલાક સુધી હડતાળના કારણે લોકો ડીઝલ અને પેટ્રોલની ખરીદી અને વેચાણ કરી શકશે નહીં.

આ હડતાલ VAT (વેલ્યુ એડેડ ટેક્સ)ના દરમાં ઘટાડો કરવાની માંગ સાથે કરવામાં આવી રહી છે.10 માર્ચે સવારે 6 વાગ્યાથી શરૂ થયેલી આ હડતાળ 12 માર્ચે સવારે 6 વાગ્યા સુધી ચાલુ રહેશે. આ સમયગાળા દરમિયાન રાજ્યના 6827 પેટ્રોલ પંપ બંધ રાખવાની જાહેરાત કરવામાં આવી છે. એસોસિએશનના પ્રમુખ રાજેન્દ્રનું કહેવું છે કે પીએમ નરેન્દ્ર મોદીએ વેટ ઘટાડવાની ખાતરી આપી હતી પરંતુ પીએમની ગેરંટી હોવા છતાં રાજસ્થાન સરકારે પેટ્રોલ અને ડીઝલ પર વેટ ઘટાડ્યો નથી.પેટ્રોલ પંપ એસોસિએશનની હડતાળ હેઠળ રાજ્યના પેટ્રોલિયમ ડીલરો ન તો ઇંધણ ખરીદશે કે ન તો વેચશે.

એસોસિએશનનું એમ પણ કહેવું છે કે સોમવારે, 11 માર્ચે જયપુરમાં પ્રદર્શન પણ કરવામાં આવશે. આ દરમિયાન સ્ટેચ્યુ સર્કલથી સચિવાલય સુધીના તમામ ડીલરો મૌન રેલી કાઢશે. રાજસ્થાન પેટ્રોલ ડીલર્સ એસોસિએશનના ખજાનચી સંદીપ બગેરિયાનું કહેવું છે કે આગામી 48 કલાક માટે “નો પરચેઝ નો સેલ” હડતાળની જાહેરાત કરવામાં આવી છે. એક અધિકારીનું કહેવું છે કે ભાજપે ચૂંટણી દરમિયાન આ મુદ્દો ઉઠાવ્યો હતો પરંતુ ડિસેમ્બરમાં સરકાર બની હોવા છતાં હજુ સુધી તેના પર કોઈ ચર્ચા થઈ નથી.  એમ પણ કહ્યું કે રાજસ્થાનના પડોશી રાજ્યો પંજાબ, હરિયાણા, ગુજરાત, મધ્ય પ્રદેશ અને ઉત્તર પ્રદેશમાં ડીઝલ-પેટ્રોલ સસ્તું છે પરંતુ રાજસ્થાનમાં મોંઘું છે