વેપાર@દેશ: ઐતિહાસિક તેજી બાદ સોના ચાંદીના ભાવમાં જોરદાર કડાકો, જાણો આજનો ભાવ

અટલ સમાચાર ડોટ કોમ, ડેસ્ક

આજે મલ્ટી કોમોડિટી એક્સચેન્જ પર સોના-ચાંદીના બજારમાં રોકાણકારોના શ્વાસ અધ્ધર કરી દે તેવી અસાધારણ ઉથલપાથલ જોવા મળી રહી છે. ઐતિહાસિક તેજી બાદ બજારમાં ભારે વેચવાલીનું દબાણ આવતા સોના અને ચાંદી બંનેના ભાવમાં મોટો કડાકો બોલી ગયો હતો.ચાંદીના ભાવમાં ભારે ઘટાડો નોંધાયો હતો, જેણે રોકાણકારોને ચોંકાવી દીધા હતા.અગાઉના ટ્રેડિંગ સત્રમાં ચાંદીનો ભાવ ₹2,51,012 પ્રતિ કિલોગ્રામ પર બંધ થયો હતો.

નવા ભાવ પ્રમાણે બજાર ખુલતાની સાથે જ ચાંદી ₹2,41,400 પર ખુલી હતી. દિવસ દરમિયાન ભારે વેચવાલીને કારણે ચાંદીનો ભાવ ₹2,32,228ની નીચલી સપાટીએ પહોંચી ગયો હતો.આ રિપોર્ટ લખાઈ રહ્યો છે ત્યાં સુધી ચાંદીનો ભાવ ₹17,858 (-7.11%) ના તોતિંગ કડાકા સાથે ₹2,33,154 પર ટ્રેડ કરી રહ્યો હતો.

ચાંદીની જેમ સોનાના ભાવમાં પણ મોટો ઘટાડો જોવા મળ્યો હતો. સોનાના 05 ફેબ્રુઆરી 2026 વાયદાનો ભાવ અગાઉના દિવસે ₹1,36,666 પ્રતિ 10 ગ્રામ પર બંધ થયો હતો. સોમવારે સોનું ₹1,36,327 પર ખુલ્યું હતું. ટ્રેડિંગ દરમિયાન સોનું ₹1,35,618ની નીચલી સપાટીએ આવી ગયું હતું. આજે સોનાનો ભાવ ₹997 (-0.73%) ના ઘટાડા સાથે ₹1,35,669 પર જોવા મળ્યો હતો.બજારના નિષ્ણાતોના મતે, ઐતિહાસિક તેજી બાદ ભારે નફાવસૂલી (પ્રોફિટ-બુકિંગ) અને વૈશ્વિક બજારના સંકેતોને કારણે આ મોટો ઘટાડો જોવા મળ્યો છે.