વેપાર@દેશ: સોનાના ભાવમાં મોટો ઉછાળો, 10 ગ્રામનો ભાવ 98 હજાર રૂપિયાને પાર

અટલ સમાચાર ડોટ કોમ, ડેસ્ક

અમેરિકાના રાષ્ટ્રપતિ ટ્રમ્પે ટેરિફ પર રોક લગાવી છે, ત્યારથી ભારતીય બજાર સહિત વૈશ્વિક બજારોમાં તેજી જોવા મળી છે.આ દરમિયાન સોનાના ભાવમાં પણ મોટો ઉછાળો જોવા મળી રહ્યો છે. આજે મહારાષ્ટ્રના જલગાંવમાં GST ઉમેર્યા બાદ સોનાનો ભાવ 98 હજાર રૂપિયાને પાર કરી ગયો છે. સોનું 98100 રૂપિયા પ્રતિ 10 ગ્રામ પર પહોંચી ગયું છે. આગામી સમયમાં સોનાના ભાવમાં તીવ્ર વધારો જોવા મળી શકે છે. નિષ્ણાતોના મતે, અક્ષય તૃતીયાના તહેવાર સુધીમાં આ સંખ્યા 1 લાખ 30 હજારની નજીક પહોંચી શકે છે. જલગાંવના બુલિયન માર્કેટમાં સોનાના ભાવે એક નવો રેકોર્ડ બનાવ્યો છે, જ્યાં સોનાનો ભાવ 98000 રૂપિયા પ્રતિ 10 ગ્રામ પર પહોંચી ગયો છે.

આંતરરાષ્ટ્રીય બજારની સ્થિતિ જોતાં, બુલિયન વેપારીઓ કહે છે કે આગામી સમયમાં સોનાના ભાવ 1 લાખ રૂપિયાને પાર કરી શકે છે. એક વર્ષ પહેલા સોનાનો ભાવ લગભગ 68 હજાર રૂપિયા હતો, એટલે કે એક વર્ષમાં સોનાના ભાવમાં લગભગ 30 હજાર રૂપિયાનો જંગી વધારો થયો છે. નવા વર્ષની શરૂઆતમાં સોનાનો ભાવ ૮૦ હજારની આસપાસ હતો, પરંતુ છેલ્લા ત્રણ મહિનામાં તેમાં લગભગ 17 હજાર રૂપિયાનો વધારો જોવા મળ્યો છે. સોના અને ચાંદીના ભાવમાં થતા વધઘટની સીધી અસર ગ્રાહકો પર પણ જોવા મળી રહી છે.