વેપાર@દેશ: સોનામાં આજે ₹1103 અને ચાંદીમાં ₹7354 ઉછાળો નોંધાયો, જાણો આજનો ભાવ

અટલ સમાચાર ડોટ કોમ, ડેસ્ક

અમેરિકા દ્વારા ભારતીય સોલર પેનલ્સ પર લાદવામાં આવેલી તોતિંગ ડ્યુટીના સમાચાર વચ્ચે રોકાણકારો હવે સુરક્ષિત રોકાણ તરફ વળ્યા છે. આ વૈશ્વિક અસ્થિરતાની સીધી અસર કિંમતી ધાતુઓના બજાર પર જોવા મળી રહી છે, જ્યાં આજે સોના અને ચાંદીના ભાવમાં મોટો ઉછાળો નોંધાયો છે.MCX પર આજે સોનાના ભાવમાં મજબૂત તેજી જોવા મળી છે. પ્રાપ્ત વિગતો અનુસાર, સોનામાં આજે અંદાજે ₹1103 નો ઉછાળો નોંધાયો છે.બજારમાં અત્યારે સોનું ₹1,60,600.00 ના સ્તર પર ટ્રેડ થઈ રહ્યું છે, જે પાછલા બંધ ભાવ કરતા +0.39% નો વધારો સૂચવે છે. સોનાની સરખામણીએ આજે ચાંદીમાં વધુ આક્રમક તેજી જોવા મળી છે. ઔદ્યોગિક માંગ અને વૈશ્વિક સેન્ટિમેન્ટને કારણે ચાંદીના ભાવમાં સીધો ₹7,354 નો મોટો ઉછાળો જોવા મળ્યો છે.

રોકાણકારો અત્યારે સોના-ચાંદીને સૌથી સુરક્ષિત વિકલ્પ માની રહ્યા છે. ચાંદી જે ગઈ કાલે 272136 પર બંધ થઇ હતી તે આજે સીધી 276999 ના લેવલે ખુલી હતી. ત્યારબાદ વયાદા બજારમાં તેજી યથાવત્ રહેતા ચાંદીએ 279490ની સપાટી સ્પર્શી હતી. અમેરિકાએ ભારતીય સોલર પેનલ્સ પર 125.87% ડ્યુટી લાદતા શેરબજારમાં Waaree Energies જેવા સ્ટોક્સમાં 11% થી 15% નો કડાકો બોલાયો છે. શેરબજારમાં અસ્થિરતા આવતા રોકાણકારો ઈક્વિટીમાંથી નાણાં ખેંચીને સોના-ચાંદીમાં રોકી રહ્યા છે. અમેરિકાની નવી ટેરિફ નીતિ અને વૈશ્વિક વેપાર યુદ્ધની આશંકાએ કિંમતી ધાતુઓની માંગમાં વધારો કર્યો છે.