વેપાર@દેશ: ચાંદીમાં ઐતિહાસિક ઉછાળો, રૂ.3.13 લાખને પાર, સોનું પણ રૂ.1.46 લાખની સર્વોચ્ચ ટોચે

અટલ સમાચાર ડોટ કોમ, ડેસ્ક

આજે 20 જાન્યુઆરી, 2026 ના રોજ સોના અને ચાંદીના ભાવે તમામ જૂના રેકોર્ડ તોડીને નવી ઐતિહાસિક સપાટી બનાવી છે. રોકાણકારોની ભારે ખરીદીને કારણે બંને કિંમતી ધાતુઓમાં આગ ઝરતી તેજી જોવા મળી રહી છે. આજના કારોબારમાં ચાંદીએ અભૂતપૂર્વ તેજી દર્શાવી છે. આજે બજાર ખુલતા સમયે ચાંદી ₹3,06,499 પર ખુલી હતી. બજારમાં આવેલી જોરદાર તેજીને કારણે ચાંદીએ ₹3,13,896 ની ઓલ-ટાઈમ હાઈ સપાટી બનાવી હતી.ચાંદીમાં ગઈકાલના બંધ ભાવની સરખામણીમાં ₹1,180 (0.38%) નો ઉછાળો જોવા મળી રહ્યો છે અને ભાવ ₹3,11,455 આસપાસ ટ્રેડ થઈ રહ્યો છે.

ચાંદીની સાથે સાથે સોનામાં પણ આજે રેકોર્ડબ્રેક તેજી જોવા મળી. MCX પર 5 ફેબ્રુઆરી, 2026 ના વાયદામાં સોનાના ભાવે નવી ઊંચાઈએ પહોંચ્યા. સોમવારે સોનાનો વાયદો ₹1,45,639 પ્રતિ 10 ગ્રામ પર બંધ થયો હતો. આજે સોનું ₹1,45,775 ના ભાવે ખુલ્યું હતું. દિવસ દરમિયાન સોનાએ ₹1,46,567 ની સર્વોચ્ચ સપાટીને સ્પર્શ કર્યો હતો.હાલમાં સોનું ગઈકાલના બંધ ભાવની સરખામણીમાં ₹551 (0.38%) ના વધારા સાથે ₹1,46,190 પર કારોબાર કરી રહ્યું છે.આ ઐતિહાસિક તેજીને કારણે બજારમાં રોકાણકારોમાં ભારે ઉત્સાહનો માહોલ છે.