વેપાર@દેશ: ધનતેરસ અને દિવાળી પહેલા સોના-ચાંદીના ભાવમાં મોટો કડાકો, જાણો આજનો ભાવ

અટલ સમાચાર ડોટ કોમ, ડેસ્ક

તેહેવારોની સિઝનમાં સોના-ચાંદીના ભાવ સતત ઘટી રહ્યા છે. મલ્ટી કોમોડિટી એક્સચેન્જથી લઈને સ્થાનિક બજાર સુધી કિંમતી ધાતુઓના ભાવમાં મોટો કડાકો બોલાયો છે. વિતેલા સપ્તાહના માત્ર ચાર દિવસના કારોબારમાં જ ચાંદીનો પરપોટો ફૂટી ગયો અને સ્થાનિક બજારમાં એક જ ઝાટકે તે 16,000 રૂપિયાથી વધુ સસ્તી થઈ ગઈ. MCX પર હવે ચાંદી પોતાના હાઈ લેવલથી લગભગ 2.24 લાખ રૂપિયા સસ્તી મળી રહી છે, જ્યારે સોનાના ભાવમાં પણ મોટો ઘટાડો નોંધાયો છે. સૌપ્રથમ દિલ્હી સહિત દેશભરના બજારોમાં ચાંદીના ભાવમાં આવેલા ફેરફારની વાત કરીએ તો, દિવાળી અને ધનતેરસ પહેલાં જ તેમાં મોટો કડાકો આવ્યો છે અને તેનો ભાવ હવે 2 લાખ રૂપિયા પ્રતિ કિલોગ્રામની પણ નીચે આવી ગયો છે.

ઇન્ડિયન બુલિયન જ્વેલર્સ એસોસિએશન અનુસાર, સ્થાનિક બજારમાં 16 ઓક્ટોબરના રોજ ચાંદીનો ભાવ 2,10,918 રૂપિયા પર બંધ થયો હતો, જે આ શુક્રવારે ઘટીને 1,94,415 રૂપિયા પર આવી ગયો છે. એટલે કે ચાંદી પ્રતિ કિલોએ 16,503 રૂપિયા જેટલી સસ્તી થઈ ગઈ છે. માત્ર સ્થાનિક બજારમાં જ નહીં, પરંતુ વાયદા બજારમાં પણ ચાંદીના ભાવ તૂટ્યા છે. 4 ડિસેમ્બરની એક્સપાયરીવાળી 1 કિલો ચાંદી 16 ઓક્ટોબરના રોજ MCX પર 2,11,187 રૂપિયા પર હતી, તે આ શુક્રવારે ઘટીને 1,96,100 રૂપિયા રહી ગઈ હતી. આ હિસાબે ચાંદી ચાર દિવસમાં વાયદા બજારમાં 15,087 રૂપિયા પ્રતિ કિલો સસ્તી થઈ છે.

ચાંદીના ભાવમાં આ સપ્તાહે આવેલા મોટા ઘટાડાના કારણે હવે આ કિંમતી ધાતુ પોતાના લાઈફ ટાઈમ હાઈ લેવલ 4,20,048 રૂપિયાથી અડધા કરતાં પણ ઓછા ભાવે મળી રહી છે, જે સ્તરે તે આ વર્ષે જાન્યુઆરી મહિનાના છેલ્લા સપ્તાહમાં પહોંચી હતી. વર્તમાન ભાવ સાથે સરખામણી કરીએ તો 1 કિલો ચાંદીનો ભાવ હવે પોતાના ઓલ ટાઈમ હાઈથી 2,23,948 રૂપિયા ઘટી ચૂક્યો છે. આ કિંમતી પીળી ધાતુ પણ આ અઠવાડિયે જોરદાર ગગડી છે. 4 ડિસેમ્બરની એક્સપાયરીવાળું 10 ગ્રામ સોનું 1,47,918 રૂપિયાથી 5,768 રૂપિયા સસ્તું થઈને 1,42,150 રૂપિયા પર આવી ગયું છે. તેના ભાવમાં પ્રતિ 10 ગ્રામે 4,796 રૂપિયાનો ઘટાડો નોંધાયો છે અને તેનો ભાવ 1,46,426 રૂપિયાથી ઘટીને 1,41,630 રૂપિયા થઈ ગયો છે.