વેપાર@દેશ: સોનામાં તેજી પાછી ફરી! અનેક શહેરોમાં સોનાના ભાવમાં વધારો જોવા મળ્યો

અટલ સમાચાર ડોટ કોમ, ડેસ્ક

સોનામાં આજે 25મી એપ્રિલે તેજી પાછી આવી છે. દિલ્હી, મુંબઈ, અમદાવાદ, પટના સહિત દેશના અનેક શહેરોમાં સોનાના ભાવમાં વધારો જોવા મળી રહ્યો છે. તાજેતરમાં મધ્ય પૂર્વમાં તણાવ ઘટાડવા સહિત અન્ય વિવિધ વૈશ્વિક અને સ્થાનિક પરિબળોના કારણે સોનાના ભાવમાં ઘટાડો થયો હતો. જોકે, ગુરુવારે 24 કેરેટ સોનાનો ભાવ વધીને પ્રતિ 10 ગ્રામ 72,710ના સ્તરે પહોંચ્યા છે.વધુમાં ચેન્નાઈમાં 24 કેરેટ સોનાનો ભાવ વધીને 73,430 રૂપિયા પ્રતિ 10 ગ્રામ થઈ ગયો છે.

ચાંદીમાં સતત ઘટાડો જોવા મળ્યો છે અને તેનો ભાવ ઘટીને પ્રતિ કિલો રૂ. 82,800ના સ્તરે આવી ગયો છે.અમદાવાદમાં 22 કેરેટ સોનાની છૂટક કિંમત 66,660 રૂપિયા પ્રતિ 10 ગ્રામ છે. 24 કેરેટ સોનાની કિંમત 72,710 રૂપિયા પ્રતિ 10 ગ્રામ છે. 25 એપ્રિલ 2024ના રોજ દિલ્હીમાં 22 કેરેટ સોનાની કિંમત આશરે રૂ. 66,760 પ્રતિ 10 ગ્રામ છે. જ્યારે 24 કેરેટ સોનાની કિંમત અંદાજે 72,810 રૂપિયા પ્રતિ 10 ગ્રામ છે. હાલમાં મુંબઈમાં 22 કેરેટ સોનાની કિંમત 66,610 રૂપિયા પ્રતિ 10 ગ્રામ છે, જ્યારે 24 કેરેટ સોનાની કિંમત 72,660 રૂપિયા પ્રતિ 10 ગ્રામ છે.

5 જૂનના કોન્ટ્રાક્ટ માટે સોનાના વાયદાના ભાવમાં ઘટાડો જોવા મળી રહ્યો છે. સવારે 10.30 વાગ્યાની આસપાસ કિંમત 70,874 રૂપિયા પ્રતિ 10 ગ્રામ પર ટ્રેડ થઈ રહી હતી. 3 મેના કોન્ટ્રાક્ટ માટે ચાંદીના વાયદાના ભાવમાં પણ ઘટાડો જોવા મળી રહ્યો છે. તેની કિંમત 80,234 રૂપિયા પ્રતિ 10 ગ્રામ છે. તમને જણાવી દઈએ કે ગોલ્ડમેન સાક્સે અનુમાન લગાવ્યું છે કે આ વર્ષે સોનાની કિંમત વધીને $2,700 પ્રતિ ઔંસ થશે. કેટલાક વિશ્લેષકો એવું પણ માને છે કે જો મધ્ય પૂર્વમાં તણાવ વધે તો સોનાની કિંમત $3000 પ્રતિ ઔંસ સુધી જઈ શકે છે.