શૈક્ષણિક@દેશ: શિક્ષણ મંત્રાલયની યોજના; બોર્ડની પરીક્ષામાં નાપાસ થવા પર પણ હવે અભ્યાસ બંધ નહીં થાય

અટલ સમાચાર ડોટ કોમ, ડેસ્ક

બોર્ડની પરીક્ષા પાસ ન કરી શકનારા વિદ્યાર્થીઓ માટે રાહતના સમાચાર છે. હવે નાપાસ થવાના કિસ્સામાં, તેમને ફરીથી શાળામાં પ્રવેશ આપવામાં આવશે અને નિયમિત વિદ્યાર્થી તરીકે ગણવામાં આવશે. તેમના માટે વિશેષ વ્યવસ્થા કરવામાં આવશે અને તેઓ નિયમિત વિદ્યાર્થીઓની જેમ વર્ગમાં હાજરી આપી શકશે.શિક્ષણ મંત્રાલય આ અંગે વિચારણા કરી રહ્યું છે. આનાથી નાપાસ થયા બાદ અભ્યાસ છોડી દેતા વિદ્યાર્થીઓની સંખ્યામાં ઘટાડો થવાની ધારણા છે. શિક્ષણ મંત્રાલય ટૂંક સમયમાં આ અંગે નિયમ લાવી શકે છે અને આ નિયમ તમામ રાજ્યો માટે હશે.

આ અંતર્ગત ધોરણ 10 કે 12માં નાપાસ થનાર વિદ્યાર્થીઓને માત્ર નિયમિત વિદ્યાર્થીઓ તરીકે જ શાળામાં પ્રવેશ મળશે અને તેમને ભૂતપૂર્વ વિદ્યાર્થીની જેમ નહીં સામાન્ય વિદ્યાર્થીની જેમ સુવિધાઓ મળશે. મહત્વની વાત એ છે કે જ્યારે આ વિદ્યાર્થીઓ આવતા વર્ષે પરીક્ષા પાસ કરશે ત્યારે તેમના સર્ટિફિકેટ પર ક્યાંય એવું લખવામાં આવશે નહીં કે તેઓએ બીજા પ્રયાસમાં પરીક્ષા પાસ કરી છે અથવા તેઓ એક વર્ષ નાપાસ થયા છે. આનાથી નાપાસ થયા બાદ અભ્યાસ છોડી દેતા વિદ્યાર્થીઓની સંખ્યામાં ઘટાડો થવાની ધારણા છે.

શિક્ષણ મંત્રાલયની યોજના છે કે જ્યારે કોઈ વિદ્યાર્થી સ્કૂલમાં એડમિશન લે છે ત્યારે તેના પર 12મી સુધી નજર રાખવામાં આવે. જો કે, જે વિદ્યાર્થીઓ નાપાસ થયા પછી નિયમિત વિદ્યાર્થીઓ તરીકે શાળાએ આવવા માંગતા નથી તેઓ પણ ઓપન સ્કૂલ જેવા વિકલ્પો પસંદ કરી શકે છે.શિક્ષણ મંત્રાલયે શોધી કાઢ્યું છે કે દર વર્ષે લગભગ 46 લાખ વિદ્યાર્થીઓ ધોરણ 10 અને 12માં નાપાસ થાય છે. તેમાંથી મોટાભાગના અભ્યાસ છોડી દે છે. રિપોર્ટ દર્શાવે છે કે વર્ષ 2022માં નાપાસ થયેલા 55 ટકા વિદ્યાર્થીઓએ ક્યાંય એડમિશન લીધું નથી.