ચૂંટણી@ગુજરાત: સૌ પ્રથમ પોસ્ટલ બેલેટની ગણતરી શરૂ, શરૂઆતના વલણોમાં ભાજપ અને કોંગ્રેસ વચ્ચે રસાકસી

અટલ સમાચાર ડોટ કોમ, ડેસ્ક

સ્થાનિક સ્વરાજની સંસ્થાઓની ચૂંટણી માટે આજે ફેંસલાનો દિવસ છે. રાજ્યની ૧૫ મહાનગરપાલિકાઓ, ૮૪ નગરપાલિકાઓ, ૩૪ જિલ્લા પંચાયતો અને ૨૬૦ તાલુકા પંચાયતોની હજારો બેઠકો પર રવિવારે યોજાયેલા મતદાન બાદ આજે સવારે ૮ વાગ્યાથી રાજ્યભરના વિવિધ કેન્દ્રો પર મતગણતરી શરૂ કરી દેવામાં આવી છે.

સૌ પ્રથમ પોસ્ટલ બેલેટની ગણતરી સાથે પ્રક્રિયાની શરૂઆત કરવામાં આવી હતી, જે પૂર્ણ થયા બાદ હવે ઈવીએમ મશીનોમાં કેદ થયેલા મતોની ગણતરી ચાલી રહી છે. શરૂઆતના વલણોમાં ભાજપ અને કોંગ્રેસ વચ્ચે પરંપરાગત રસાકસી જોવા મળી રહી છે, જ્યારે સુરત અને અન્ય શહેરી વિસ્તારોમાં આમ આદમી પાર્ટી પડકાર ફેંથશ રહી હોય તેમ જણાય છે.

આ ચૂંટણીમાં અંદાજે ૪.૧૮ કરોડથી વધુ મતદારોએ પોતાના મતાધિકારનો ઉપયોગ કર્યો હતો. જેનું અંતિમ પરિણામ બપોર સુધીમાં સ્પષ્ટ થઈ જવાની અપેક્ષા છે. અમદાવાદ, સુરત, વડોદરા અને રાજકોટ જેવી મોટી મહાનગરપાલિકાઓમાં સત્તાના સૂત્રો કોણ સંભાળશે તેના પર સૌની નજર ટકેલી છે. આ ચૂંટણી માત્ર સ્થાનિક વિકાસના મુદ્દાઓ પર જ નહીં, પરંતુ આવતા વર્ષે યોજાનારી વિધાનસભાની ચૂંટણીના પૂર્વ સંકેત તરીકે પણ જોવામાં આવી રહી છે.

વહીવટી તંત્ર દ્વારા પરિણામોની જાહેરાત માટે ખાસ ડિજિટલ ડિસ્પ્લે અને ઓનલાઈન પોર્ટલની વ્યવસ્થા કરવામાં આવી છે જેથી લોકો ઝડપથી અપડેટ્સ મેળવી શકે. જેમ જેમ ઉમેદવારોના વિજયના સમાચાર મળી રહ્યા છે તેમ તેમ રાજકીય પક્ષોના કાર્યાલયો પર કાર્યકરો ઉમટી રહ્યા છે અને જીતના ગુલાલ સાથે ઉજવણીની તૈયારીઓ શરૂ કરી દેવામાં આવી છે.