ચૂંટણી@દેશ: મતદાન વચ્ચે EVM ફરી ચર્ચામાં, ક્યાંક બગડ્યું તો ક્યાંક ભાજપનો 'ટેગ' મળતા ખળભળાટ

અટલ સમાચાર ડોટ કોમ, ડેસ્ક

છઠ્ઠા તબક્કામાં રાજધાની દિલ્હીથી લઈને પશ્ચિમ બંગાળ, જમ્મુ-કાશ્મીરના અનંતનાગ-રાજૌરી અને ઓડિશાની પુરી સીટ સુધી મોટાભાગની બેઠકો પર મતદાન દરમિયાન ઈવીએમ ખોટકાયાની ફરિયાદો સામે આવતાં ખળભળાટ મચી ગયો છે. રાજધાની દિલ્હીમાં આમ આદમી પાર્ટીનું કહેવું છે કે મતદાન ધીમી ગતિએ ચાલી રહ્યું છે. કેજરીવાલે કહ્યું કે ચૂંટણી પંચે સુનિશ્ચિત કરવું જોઈએ. આમ આદમી પાર્ટીના નેતા આતિશીએ પણ કહ્યું કે દિલ્હીના કેટલાક વિસ્તારોમાં મતદાન ધીમું છે. 

અહીંના મતદાન મથક પર લાંબી લાઈનો જોવા મળી રહી છે અને EVM છેલ્લા 2 કલાકથી બગડેલું છે. મુસ્લિમ મહિલા મતદારોનું કહેવું છે કે તેઓ મોંઘવારી, મહિલા સુરક્ષા અને બેરોજગારી જેવા મુદ્દાઓ પર મતદાન કરી રહી છે. લોકો વર્તમાન સાંસદ અને સરકારથી નાખુશ છે. ઓડિશાની પુરી લોકસભા સીટના ભાજપ ઉમેદવાર સંબિત પાત્રાએ પોતે ફરિયાદ કરી હતી કે EVM મશીન કામ નથી કરી રહ્યું, અમે વાત કરી રહ્યા છીએ. તેમણે કહ્યું કે EVM મશીન કામ નથી કરી રહ્યું, હું રિટર્નિંગ ઓફિસર સાથે વાત કરી રહ્યો છું. જ્યારે તેમને પૂછવામાં આવ્યું કે ઘણા લોકો આવ્યા હતા અને મશીન કામ ન કરવાને કારણે ઘણા લોકો વોટિંગ કર્યા વિના જ પાછા ફર્યા હતા, તો તેમણે જવાબ આપ્યો કે તેમને સમય વધારવા માટે કહેવામાં આવશે.

બીજી તરફ, જમ્મુ-કાશ્મીરની અનંતનાગ-રાજૌરી બેઠક પરથી પીડીપીના ઉમેદવાર મહેબૂબા મુફ્તીએ આરોપ લગાવ્યો કે મશીનો સાથે છેડછાડ કરવામાં આવી રહી છે અને ઘણી જગ્યાએ મશીનો કામ કરી રહ્યાં નથી. જેના કારણે મહેબૂબા મુફ્તી ધરણાં પર બેસી ગયા હતા. પીડીપીના વડા મહેબૂબા મુફ્તીએ આરોપ લગાવ્યો કે પોલીસે પીડીપી પોલિંગ એજન્ટોને કોઈ કારણ વગર પોલીસ સ્ટેશનમાં પૂરી દીધા છે.

પશ્ચિમ બંગાળમાં સીએમ મમતા બેનર્જીએ આરોપ લગાવ્યો હતો કે ભાજપ ઈવીએમ સાથે છેડછાડ કરીને વોટિંગ સાથે ચેડાં કરવાનો પ્રયાસ કરી રહ્યો છે. પાર્ટીએ એમ પણ કહ્યું કે આજે બાંકુરાના રઘુનાથપુરમાં 5 ઈવીએમ પર ભાજપનું ટેગ જોવા મળ્યું હતું. તેમણે ચૂંટણી પંચને કહ્યું કે તે તરત જ આની તપાસ કરે અને પગલાં લે.ઉત્તર પ્રદેશના વર્તમાન સાંસદ અને સુલતાનપુરના ભાજપના ઉમેદવાર મેનકા ગાંધીએ કહ્યું, “2-3 જગ્યાએ EVMમાં સમસ્યા છે, 2-3 જગ્યાએ તો નાની-નાની સમસ્યાઓ છે, કેટલાક અધિકારીઓ પોતે પ્રશિક્ષિત નથી. લોકસભા ચૂંટણીના છઠ્ઠા તબક્કામાં વિવિધ રાજ્યોમાંથી ઈવીએમમાં​ખરાબી અને છેડછાડના સમાચારો પર ચૂંટણી પંચે કહ્યું કે ચૂંટણી પંચ દરેક ફરિયાદની તપાસ કરશે.