ખુલાસો@દિલ્હી: 5600 કરોડના ડ્રગ્સ કેસમાં દિગ્ગજ કોંગ્રેસ નેતાનું નામ આવતા હડકંપ

અટલ સમાચાર ડોટ કોમ, ડેસ્ક

દિલ્હીથી ઝડપાયેલા 5600 કરોડ રૂપિયાના ડ્રગ્સના મામલામાં મોટો ખુલાસો થયો છે. આરોપીએ સોશિયલ મીડિયા પર ડિક્કી ગોયલ નામથી પ્રોફાઇલ બનાવી છે. કોંગ્રેસના ઘણા નેતાઓ સાથે તુષાર ગોયલના ફોટોગ્રાફ્સ પણ સામે આવ્યા છે. દિલ્હી પોલીસની સ્પેશિયલ સેલની પૂછપરછ દરમિયાન આ ખુલાસો થયો છે. સ્પેશિયલ સેલની પૂછપરછ દરમિયાન તુષાર ગોયલે પોતે ખુલાસો કર્યો છે કે તે 2022માં કોંગ્રેસ દિલ્હીના RTI સેલનો પ્રમુખ હતો.5600 કરોડ રૂપિયાના જપ્ત ડ્રગ્સ કેસના તાર દુબઈ સાથે જોડાયેલા પણ છે.

આ કેસમાં દુબઈના એક મોટા બિઝનેસમેનનું નામ પણ સામે આવ્યું છે જે કોકેઈનનો મોટો સપ્લાયર છે. એજન્સીઓને એ વાત સારી રીતે ખબર છે કે ડ્રગ્સની ખરીદી અને વેચાણ માટે દુબઈ ડી કંપનીનું એક સેફ ઝોન છે.સ્પેશિયલ સેલના એડિશનલ કમિશનર પ્રમોદ કુશવાહાના જણાવ્યા અનુસાર, 560 કિલો કોકેઈનના કન્સાઈનમેન્ટની સાથે દિલ્હી પોલીસે 40 કિલો હાઈડ્રોપોનિક મારિજુઆના પણ જપ્ત કર્યો છે. જેની કિંમત 20 કરોડ રૂપિયા હોવાનું કહેવાય છે. આ મારિજુઆના ફૂકેટથી ફ્લાઈટ મારફતે દિલ્હી લાવવામાં આવ્યું હતું. પ્રમોદ કુશવાહાના જણાવ્યા અનુસાર, ત્રણ મહિના પહેલા કેન્દ્રીય એજન્સીઓ દ્વારા તેમને માહિતી મળી હતી કે એક મોટું મોડ્યુલ ડ્રગ્સની દાણચોરી કરી રહ્યું છે, જે દેશભરમાં ફેલાયેલું છે.

દિલ્હી પોલીસ આ મામલે 3 મહિનાથી સખત મહેનત કરી રહી હતી. ઘણા ઈનપુટની તપાસ કરવામાં આવી રહી હતી. ઘણા લોકો પર નજર રાખવામાં આવી રહી હતી. હવે પોલીસની મહેનત રંગ લાવી અને દિલ્હી પોલીસની સ્પેશિયલ સેલે એક મોટા આંતરરાષ્ટ્રીય ડ્રગ સ્મગલરના મોડ્યુલનો પર્દાફાશ કરી દીધો. દિલ્હીમાં આ મોડ્યુલનો લીડર તુષાર છે.પોલીસે સ્થળ પરથી હિમાંશુ અને ઔરંગઝેબ નામના બે લોકોની 15 કિલો કોકેઈન સાથે ધરપકડ કરી લીધી. આ પછી, જ્યારે પોલીસે હિમાંશુ અને ઔરંગઝેબની પૂછપરછ કરી તો જાણવા મળ્યું કે નજીકના વેરહાઉસમાં કપડાના બોક્સમાં કોકેન છુપાવીને રાખવામાં આવ્યું છે. દિલ્હી પોલીસના જણાવ્યા અનુસાર આંતરરાષ્ટ્રીય બજારમાં એક કિલો કોકેનની કિંમત 10 કરોડ રૂપિયાની આસપાસ છે. ત્યારે 560 કિલો કોકેઈનની કિંમત 5600 કરોડ રૂપિયા જણાવવામાં આવી રહી છે.