પર્દાફાશ@પંચમહાલ: લગ્ન નોંધણીમાં મિલીભગત, 50 લાખનું કૌભાંડ, તલાટી સસ્પેન્ડ

અટલ સમાચાર ડોટ કોમ, ડેસ્ક

પંચમહાલ જિલ્લાના જાંબુઘોડામાં લગ્ન નોંધણીના નામે મોટું કૌભાંડ બહાર આવ્યું છે. કણજીપાણી ગ્રામ પંચાયતના ઇન્ચાર્જ તલાટી અર્જુન મેઘવાલ વિરુદ્ધ નકલી દસ્તાવેજો વડે બોગસ લગ્નો નોંધાવીને લાખો રૂપિયા વસૂલીના આરોપો લગાવાયા છે. વાયરલ વીડિયોમાં તલાટીએ જાતે જ કબૂલ્યું હોવાનું જણાવાયું છે કે તેઓ એક લગ્ન નોંધણી પર 2500 રૂપિયા લે છે. આ કૌભાંડમાં એક જ વર્ષમાં 2000 જેટલા બોગસ લગ્નો નોંધાવીને 50 લાખ રૂપિયાની કમાણી કરી હોવાનો દાવો સરદાર પટેલ ગ્રુપના અધ્યક્ષ લાલજી પટેલે કર્યો છે.

ઘટના ત્યારે સામે આવી જ્યારે તલાટીનો વીડિયો સોશિયલ મીડિયા પર વાયરલ થયો, જેમાં તેઓ આ કૌભાંડ વિશે ખુલ્લેઆમ વાત કરતા જોવા મળે છે. આ વીડિયો બાદ જાંબુઘોડા તાલુકા વિકાસ અધિકારી દ્વારા તાત્કાલિક તપાસ ટીમની રચના કરવામાં આવી રહી છે. તપાસ ટીમે કણજીપાણી સહિત ચાર ગામો કણજીપાણી, ઉધવાણ, ભદ્રલા અને કંકોડાકોઈમાંથી 2025માં થયેલી તમામ લગ્ન નોંધણીઓના દસ્તાવેજો કબજે લઈ લીધા છે. પ્રાથમિક તપાસમાં જાણવા મળ્યું છે કે એક જ દિવસમાં 24 લગ્નો નકલી દસ્તાવેજો વડે નોંધાવવામાં આવ્યા હતા, જેમાં અરજદારો પાસેથી લગભગ 2500 રૂપિયા પ્રતિ લગ્ન વસૂલવામાં આવ્યા હતા.

કણજીપાણી ગામ ‘બોગસ લગ્ન નોંધણી’નું એપીસેન્ટર બન્યું છે, જ્યાં રાજ્યભરમાંથી યુગલો આવે છે. 14 નવેમ્બરે એક જ યુવતીની 3 કલાકમાં ચાર શહેરોમાં હાજરી દર્શાવીને લગ્નો નોંધાવવામાં આવ્યા હતા, જે અશક્ય છે. આ કૌભાંડમાં સ્થાનિક તંત્રની મિલીભગત પણ હોવાનો આક્ષેપ કરતાં તેમણે કહ્યું કે આવા કેસોમાં પ્રેમ લગ્ન અને ભાગીને લગ્ન કરનારા યુવાનો પણ બોગસ દસ્તાવેજો વડે છેતરાઈ જાય છે. ભદ્રલા, ઘોઘંબાની કંકોડાકોઈ અને ભૂતપૂર્વ નાથકુવા ગ્રામ પંચાયતોમાં પણ બોગસ લગ્ન નોંધણીના કેસો નોંધાયા હતા, જેમાં કંકોડાકોઈમાં સાત મહિનામાં 361 લગ્નો નોંધાવાયા હતા, જેમાં વિસ્તારની બહારના અને લઘુમતી સમુદાયના લગ્નોનો સમાવેશ થતો હતો. આ કારણે તલાટીઓની બદલી કરવામાં આવી હતી.

કણજીપાણી અને ઉધવાણના સરપંચોએ પણ તાલુકા પંચાયતને આ ગેરરીતિઓ વિશે જાણ કરી હતી, પરંતુ કાર્યવાહી નહોતી થઈ. તપાસ ચાલુ છે અને તલાટી અર્જુન મેઘવાલને સસ્પેન્ડ કરી દેવામાં આવ્યા છે. જિલ્લા કલેક્ટર અને પંચાયત વિભાગે આ મામલે કડક કાર્યવાહીની જાહેરાત કરી છે.