આગાહી@ગુજરાતઃ આ વિસ્તારમાં 2 દિવસમાં ઠંડીનો પારો 10 ડિગ્રીથી નીચે પહોંચશે

અટલ સમાચાર, ડેસ્ક

રાજ્યમાં વેસ્ટર્ન ડિસ્ટર્બન્સ પસાર થતાં જ નીચલા લેવલ પર રહેલા ઠંડા અને સૂકા પવનોના કારણે શહેરમાં 27થી 29 ડિસેમ્બર વચ્ચે ઠંડીનો પારો 10 ડિગ્રીથી નીચે પહોંચશે. જ્યારે વડોદરામાં 29 ડિસેમ્બરે પારો 8 ડિગ્રી સુધી નીચે ગગડે તેવી આગાહી હવામાન વિભાગ દ્વારા કરવામાં આવી છે. હવામાન વિભાગની આગાહી પ્રમાણે હાલ એક ફ્રેશ વેસ્ટર્ન ડિસ્ટર્બન્સ જે ટર્ફ સ્વરૂપે ઉત્તર-પૂર્વ (30N-52E) દિશાની આસપાસ રહેલું છે. આ વેસ્ટર્ન ડિસ્ટર્બન્સ 27 ડિસેમ્બરની આસપાસ પશ્ચિમ હિમાલય અને ઉત્તર પશ્ચિમ ભારતના વિસ્તારોને અસર કરશે.

અટલ સમાચાર આપના મોબાઇલમાં મેળવવા અહિં ક્લિક કરો

શુક્રવારે અમદાવાદમાં 16 ડિગ્રી સરેરાશ લઘુતમ તાપમાન નોંધાયુ હતુ. જેથી છેલ્લા કેટલાક દિવસની સરખામણીએ ઠંડીમાં સાધારણ ઘટાડો થયો છે. બીજી તરફ નલિયા 7.9 ડિગ્રી સાથે ઠંડુંગાર રહ્યું હતુ. હવામાન અંગે આગાહી કરતી ખાનગી સંસ્થાના અનુમાન પ્રમાણે, અમદાવાદમાં 27થી 29 ડિસેમ્બર દરમિયાન 10 ડિગ્રીની આસપાસ તાપમાન નોંધાઇ શકે છે. હવામાન વિભાગે જણાવ્યું છે કે, ‘આગામી બે દિવસ સરેરાશ લઘુતમ તાપમાનમાં તબક્કાવાર વધારો થશે. આ પછી લઘુતમ તાપમાન 3થી 4 ડિગ્રી સુધી ઘટતાં ઠંડીમાં વધારો થઇ શકે છે.’

નોંધનીય છે કે, કાશ્મીરમાં નદી-ઝરણાં જામવા લાગ્યાં છે. બીજી બાજુ, રાજસ્થાનના એકમાત્ર હિલ સ્ટેશન માઉન્ટ આબુમાં સતત 11 દિવસથી બરફ જામ્યો છે. શુક્રવારે તાપમાન 1 ડીગ્રીની આસપાસ હતુ. આગામી દિવસોમાં મેદાન વિસ્તારમાં ઠંડા પવનને કારણે તાપમાનમાં ઘટાડો થઈ શકે છે, જ્યારે ઉત્તરાખંડમાં 27 ડિસેમ્બરે વરસાદ થઈ શકે છે. લાહોલ સ્પિતિના કાજામાં 3720 મીટર ઊંચાઈ પર તાપમાન માઈનસ 20 ડીગ્રી હોવા છતાં અહીં આઈસ હોકી કેમ્પ ચાલી રહ્યો છે.