ખળભળાટ@ગુજરાત: મોટા પોલીસ અધિકારીને અજાણી યુવતિ સાથે ઈશ્કવાળી દોસ્તી ભારે પડી, લાલચમાં ગુમાવ્યા લાખો રૂપિયા

અટલ સમાચાર, ડેસ્ક

ગુજરાતના પોલીસ વર્તુળમાં આજકાલ મધ્યપ્રદેશની એક યુવતીની ચર્ચાએ જોર પકડયું છે. એક ખાનગી ન્યૂઝ અનુસાર ઈન્દૌરની આ યુવતીએ ગુજરાતના છ આઈપીએસ અધિકારીને હની ટ્રેપમાં ફસાવી મોટી રકમ પડાવી હોવાની ચર્ચા છે, જોકે, આ મામલે કોઈ પોલીસ ફરિયાદ દાખલ નથી થઈ. આ યુવતી કરાઈ પોલીસ ટ્રેનિંગ એકેડમીમાં ઘોડેસવારી શીખવા માટે આવતી હતી અને અહીં જ પોલીસ અધિકારીઓના સંપર્કમાં આવી હતી. જોકે આ સમગ્ર મામલે અટલ સમાચાર માત્ર સૂત્રો અને ખાનગી ન્યૂઝના આધારે જણાવી રહ્યું છે. 

એક ખાનગી ન્યૂઝના અહેવાલ અનુસાર છ મહિના પહેલા શરુ થયેલા આ પ્રકરણમાં ઈન્દોરની એક સ્વરુપવાન યુવતીએ કરાઈ એકેડમીમાં ઘોડેસવારી શીખવા માટે પોતાનું નામ નોંધાવ્યું હતું. થોડા સમયમાં જ મીઠું-મીઠું બોલતી આ યુવતીએ છ યુવા આઈપીએસ અધિકારીઓ સાથે ફ્રેન્ડશીપ કરી લીધી હતી. વોટ્સએપ ચેટ અને સેલ્ફીથી શરુ થયેલી આ દોસ્તી જોતજોતામાં જ મર્યાદા ઓળંગી ગઈ હતી. પોતાની જાળમાં સપડાયેલા IPS અધિકારીઓ છટકી ના શકે તે રીતે આખીય ગેમ સેટ કર્યા બાદ આ યુવતીએ તેમની પાસેથી પૈસા માગવાનું શરુ કર્યું હતું.  

IPS અધિકારીએ મોઢું બંધ રાખવા 1 કરોડ આપ્યા ? 

સૂત્રોનું માનીએ તો આ યુવતીની ચર્ચા એક પરિણિત IPSના ઘર સુધી પહોંચી ગઈ હતી અને આ અધિકારીએ યુવતીને મોઢું બંધ રાખવા માટે 1 કરોડ રુપિયા ચુકવ્યા હોવાની ચર્ચા છે. સ્વરુપવાન યુવતીની હની ટ્રેપમાં ફસાયેલા કોઈ આઈપીએસ અધિકારી ફરિયાદ કરવા આગળ નથી આવ્યા. સૂત્રોનું માનીએ તો યુવતી પાસે પોતાના પ્રાઈવેટ ફોટો હોવાથી ખુદ અધિકારીઓ જ ફરિયાદ કરતા ડરી રહ્યા છે.

6 માંથી 2 IPS બચી ગયા ? 

ચર્ચાઓ મુજબ યુવતીની જાળમાં સપડાયેલા 6માંથી 2 IPSને શંકા જતાં તેઓ તેમાંથી નીકળી ગયા હતા. આ યુવતીએ તમામ અધિકારીઓને સોશિયલ મીડિયા પર પણ ફ્રેન્ડ બનાવ્યા હતા. જે બે અધિકારીઓ તેની જાળમાં સપડાવાથી બચી ગયા હતા તેમણે સિનિયર્સનું આ મામલે ધ્યાન દોર્યું હતું. ત્યારબાદ તેની અંદરખાને તપાસ શરુ કરાઈ હતી અને છ મહિના બાદ યુવતીની સાચી ઓળખ મેળવવામાં પોલીસને સફળતા મળી હતી. અધિકારીઓ દ્વારા યુવતીનો ફોટો તેનો ભોગ બનેલા ઓફિસર્સને બતાવવામાં આવ્યો હતો. 

સૂત્રોનું માનીએ તો, હનીટ્રેપનો ભોગ બનેલા અધિકારીઓએ યુવતીને ઓળખી બતાવી હતી, પરંતુ તેની સામે ફરિયાદ દાખલ કરવાનો ઈનકાર કરી દીધો હતો. આખરે પોલીસ આ યુવતીના ઘરે પહોંચી હતી અને તેના પરિવારજનો સાથે મુલાકાત પણ કરી હતી. તેણે બીજા કોઈ અધિકારીઓ કે વેપારીઓને આ રીતે ફસાવી રુપિયા પડાવ્યા છે કે કેમ તેની પણ પોલીસ દ્વારા તપાસ થઈ રહી છે. જો આવું કંઈ બહાર આવશે તો ભોગ બનનારાઓને ફરિયાદ દાખલ કરવા માટે કહેવાશે, જેથી અધિકારીઓને કરોડો પડાવનાર આ યુવતી સામે કાયદાકીય કાર્યવાહી કરી શકાય.