નૂતન વર્ષના પ્રથમ દિવસે CM ભૂપેન્દ્ર પટેલે મંદિરોમાં ઝુકાવ્યું શીશ, નાગરિકોને પાઠવી શુભકામનાઓ

વિક્રમ સંવત 2083ના નૂતન વર્ષનો પ્રારંભ ગુજરાતના મુખ્યમંત્રી ભૂપેન્દ્ર પટેલે ભક્તિ અને શ્રદ્ધા સાથે કર્યો હતો. નવા વર્ષની પ્રથમ સવારે મુખ્યમંત્રી ગાંધીનગરના પંચદેવ મંદિરે પહોંચ્યા હતા, જ્યાં તેમણે ભગવાનનાં દર્શન કરી પૂજા-અર્ચના કરી હતી. આ પ્રસંગે તેમણે રાજ્યના તમામ નાગરિકોના સુખ, સમૃદ્ધિ, શાંતિ અને તંદુરસ્ત જીવન માટે પ્રાર્થના કરી હતી. સાથે જ મંદિર પરિસરમાં ઉપસ્થિત શ્રદ્ધાળુઓને મળીને નૂતન વર્ષની શુભકામનાઓ પાઠવી હતી.

પંચદેવ મંદિરે મુખ્યમંત્રીના આગમન સમયે ગાંધીનગરના મેયર રૂપસિંહ ઠાકોર, ધારાસભ્ય રીટાબહેન પટેલ, શહેર સંગઠન પ્રમુખ ડૉ. આશિષ દવે, સ્ટેન્ડિંગ કમિટીના ચેરમેન મહેન્દ્રભાઈ સહિતના પદાધિકારીઓ પણ ઉપસ્થિત રહ્યા હતા. સૌએ સાથે મળીને નવા વર્ષની શુભેચ્છાઓની આપ-લે કરી હતી.

વિકસિત અને નશામુક્ત ગુજરાત માટે સહયોગની અપીલ
નૂતન વર્ષ નિમિત્તે નાગરિકોને સંબોધતાં મુખ્યમંત્રી ભૂપેન્દ્ર પટેલે વડાપ્રધાન નરેન્દ્ર મોદીના વિકસિત ભારત અને નશામુક્ત ભારતના સ્વપ્નને સાકાર કરવા સામૂહિક પ્રયાસો પર ભાર મૂક્યો હતો. તેમણે જણાવ્યું હતું કે, દેશ અને રાજ્યને પ્રગતિના પંથે આગળ લઈ જવા માટે દરેક નાગરિકનો સહયોગ આવશ્યક છે. દરેક વ્યક્તિનું સ્વાસ્થ્ય સારું રહે અને ગુજરાત વિકાસની નવી ઊંચાઈઓ સર કરે તેવી શુભકામના સાથે તેમણે વિકસિત અને નશામુક્ત ગુજરાતના નિર્માણમાં સૌને સહભાગી બનવા આહ્વાન કર્યું હતું.

અડાલજ ત્રિમંદિરે પણ કર્યા દર્શન
પંચદેવ મંદિરમાં દર્શન કર્યા બાદ મુખ્યમંત્રી ભૂપેન્દ્ર પટેલ અડાલજ સ્થિત ત્રિમંદિર પણ પહોંચ્યા હતા. અહીં તેમણે સીમંધર સ્વામી સહિત વિવિધ દેવી-દેવતાઓનાં દર્શન કરી પૂજા-અર્ચના કરી હતી. આ ઉપરાંત પૂજ્ય નીરૂમાં અને દાદા ભગવાન સમક્ષ શીશ ઝુકાવી સૌના કલ્યાણ, આરોગ્ય અને સુખાકારી તેમજ ગુજરાતના અવિરત વિકાસ માટે પ્રાર્થના કરી હતી. ત્રિમંદિરમાં ઉપસ્થિત દાદા ભગવાન પરિવારના અનુયાયીઓ અને શ્રદ્ધાળુઓ સાથે મુલાકાત કરી તેમને પણ નવા વર્ષની શુભેચ્છાઓ પાઠવી હતી.

અમિત શાહ અમદાવાદમાં, સી.આર. પાટીલ સુરતમાં કરશે સ્નેહમિલન
નૂતન વર્ષના અવસરે ગુજરાતના રાજકીય વર્તુળોમાં પણ શુભેચ્છા મુલાકાતો અને સ્નેહમિલનના કાર્યક્રમોનું આયોજન કરવામાં આવ્યું છે. કેન્દ્રીય ગૃહમંત્રી અમિત શાહ અમદાવાદમાં પોતાના નિવાસસ્થાને ભાજપના નેતાઓ, હોદ્દેદારો અને કાર્યકર્તાઓ સાથે નૂતન વર્ષાભિનંદન કરશે. આ કાર્યક્રમમાં તેઓ કાર્યકર્તાઓને નવા વર્ષની શુભેચ્છાઓ પાઠવશે અને તેમની સાથે સ્નેહમિલન કરશે. બીજી તરફ, ભાજપના પ્રદેશ પ્રમુખ સી.આર. પાટીલ સુરતમાં શુભેચ્છા મિલનનું આયોજન કરશે. આ કાર્યક્રમમાં મોટી સંખ્યામાં ભાજપના કાર્યકરો અને પદાધિકારીઓ ઉપસ્થિત રહેવાની શક્યતા છે. આમ, વિક્રમ સંવત 2083ના પ્રારંભે ગુજરાતમાં ધાર્મિક આસ્થા સાથે રાજકીય શુભેચ્છા મુલાકાતોનો માહોલ પણ જોવા મળી રહ્યો છે.