ઘટના@વિસનગર: દિવાળીના તહેવાર વચ્ચે તાલુકા પોલીસ સ્ટેશનમાં આગ, ત્રણ કલાકની જહેમતને અંતે આગ કાબૂમાં

અટલ સમાચાર, મહેસાણા

દિવાળીના તહેવાર વચ્ચે વિસનગર તાલુકા પોલીસ સ્ટેશનમાં આગ લાગવાની ઘટના સામે આવી છે. વિસનગર શહેરમાં દિવાળીની રાત્રે વિસનગર ફાયર શાખા ટીમને આગના કોલ મળ્યા હતા. જેમાં આજે વહેલી સવારે ચાર કલાકે વિસનગર તાલુકા પોલીસ મથકમાં અગમ્ય કારણોસર આગ લાગી હતી ઘટનાની જાણ થતાં ફાયર ટીમો દોડી ગઈ હતી.મળતી માહિતી પ્રમાણે તાલુકા પોલીસ મથકની અંદર આવેલ લાકડાની ઓરડીઓમાં આગ લાગી હતી જે બળીને ખાખ થઈ ગઈ હતી. જોકે આગ ઉપર કાબૂ મેળવવામાં પાલિકાને ત્રણ કલાક લાગ્યા હતા.

વિસનગર શહેરમાં રાત્રે બે કલાકે સોના કોમ્પ્લેક્ષમાં આવેલ ઉપરના માળે દૂકનના છત પર મુકવામાં આવેલા સામાનમાં આગ લાગવાની ઘટના સામે આવી હતી.જે ફાયર ટીમોએ બુજાવી હતી. મહત્વનું છે કે મહેસાણા જિલ્લામાં દિવાળીના તહેવારોને લઈને સમગ્ર તાલુકામાં આવેલી ફાયર ટીમો સ્ટેન્ડ બાય રહેવા સૂચના આપવામાં આવી હતી. દિવાળીના તહેવારો ભૂલી ફાયર કર્મીઓ પોતાની ફરજ અદા કરતા નજરે પડ્યા હતા.

સૂત્રોએ જણાવ્યું હતું કે,  દિવાળીના દિવસે અને રાત્રે મહેસાણા અને વિસનગરમાં આગના બનાવો સામે આવ્યા છે.જેમાં મહેસાણા ફાયર ટીમને આગના કુલ 6 કોલ તો વિસનગર ફાયર ટીમને બે કોલ મળ્યા હતા જેમાં આજે વહેલી પરોઢે વિસનગર તાલુકા પોલીસ મથકમાં આગની ઘટના સામે આવી હતી. મહેસાણા શહેરમાં મોઢેરા રોડ પર આવેલા પિંક સીટીમાં મકાનમાં લાગેલ એસીમાં એકાએક આગ લાગી હતી.બીજી બાજુ મહેસાણા શહેરમાં આવેલા કસબા વિસ્તારમાં અતુલ ભાઈ પ્રવીણ ભાઈ બારોટની દુકાનમાં પડેલા લાકડાઓમા આગ લાગવાની ઘટના સામે આવી હતી.તેમજ મહેસાણા શહેરમાં આવેલા મગપરાના ઉપરના ભાગે આવેલા બાવળીયામાં આગ લાગતા મહેસાણા પાલિકાની ફાયર ટિમો દોડી ગઈ હતી આમ દિવાળીની રાત્રે મહેસાણા પાલિકાને આગના કુલ 6 કોલ મળ્યા હતા.