સ્પોર્ટ્સ@અમદાવાદ: ભારત-પાકિસ્તાન મેચની ઓનલાઇન ટિકિટબારી ખૂલી, જાણો કેટલું છે વેઇટિંગ ?

અટલ સમાચાર, ડેસ્ક

અમદાવાદમાં વર્લ્ડકપ 2023માં 14 ઓક્ટોબરે રમાનાર ભારત અને પાકિસ્તાન વચ્ચેની મેચ માટે બીસીસીઆઇ દ્વારા 14 હજાર ટિકિટનું ઓનલાઇન વેંચાણ શરૂ કરવામાં આવ્યું છે. ઓનલાઇન ટિકિટ એપ બુક માય શો પર આ મેચનું 90 મિનિટ સુધીનું વેઇટિંગ જોવા મળી રહ્યું છે. લોકો ટિકિટ લેવા માટે પડાપડી કરી રહ્યાં છે જેને કારણે વેબસાઇટ પર 90 મિનિટ સુધીનું વેઇટિંગ બતાવી રહ્યું છે.

BCCIએ એક દિવસ પહેલા ભારત અને પાકિસ્તાન વચ્ચેની મેચનો ક્રેઝ જોતા 14 હજાર ટિકિટ ઓનલાઇન વેંચાણમાં મુકવાની જાહેરાત કરી હતી. બીસીસીઆઇએ ટ્વિટ કરીને જાણ કરી હતી કે 8 ઓક્ટોબર 2023માં બપોરના 12 વાગ્યાથી ઓનલાઇન ટિકિટ એપ બુક માય શો પર ટિકિટનું વેચાણ શરૂ કરવામાં આવશે. જોકે, ઓનલાઇન ટિકિટનું વેચાણ શરૂ થાય ત્યારથી જ વેબસાઇટની સ્ક્રિન પર 90 મિનિટ વેઇટિંગ બતાવતું હતું જેને કારણે ભારત અને પાકિસ્તાનની મેચ જોવા માંગતા ફેન્સ નિરાશ થયા હતા.

અમદાવાદમાં 1 લાખ 32 હજારની દર્શક ક્ષમતા ધરાવતા વિશ્વના સૌથી મોટા નરેન્દ્ર મોદી સ્ટેડિયમમાં 14 ઓક્ટોબરે ભારત અને પાકિસ્તાન વચ્ચે ક્રિકેટ વર્લ્ડકપ 2023ની મેચ રમાવાની છે. 14 ઓક્ટોબરના મહામુકાબલાને જોવા માટે ફેન્સ લાખો રૂપિયા પણ ખર્ચવા માટે તૈયાર છે. જોકે, બીસીસીઆઇએ ટિકિટ વેંચાણ અર્થે તો મુકી છે પણ ટિકિટનું ઓનલાઇન વેંચાણ માટે લાંબુ વેઇટિંગ જોવા મળતા સોશિયલ મીડિયા પર ફેન્સ બળાપો ઠાલવી રહ્યાં છે. કેટલાક લોકો સોશિયલ મીડિયા પર કહી રહ્યાં છે કે કિડની મળવી આસાન છે પણ ભારત અને પાકિસ્તાન વચ્ચેની મેચની ટિકિટ મળવી ઘણી મુશ્કેલ છે.

વર્લ્ડકપમાં ભારતીય ક્રિકેટ ટીમ

રોહિત શર્મા (કેપ્ટન), હાર્દિક પંડ્યા (વાઇસ કેપ્ટન), શુભમન ગિલ, વિરાટ કોહલી, શ્રેયસ અય્યર, કેએલ રાહુલ, રવિન્દ્ર જાડેજા, શાર્દુલ ઠાકુર, જસપ્રીત બુમરાહ, મોહમ્મદ સિરાજ, કુલદીપ યાદવ, મોહમ્મદ શમી, રવિચંદ્રન અશ્વિન, ઇશાન કિશન, સૂર્યકુમાર યાદવ.