દુર્ઘટના@જામનગર: ટેન્કરે એક્ટિવાને ઠોકર મારતા ચાલકનું ઘટનાસ્થળે જ મોત નીપજ્યું

અટલ સમાચાર ડોટ કોમ, ડેસ્ક 

રાજ્યમાં અકસ્માતના બનાવો ખુબજ વધી ગયા છે. ફરી એકવાર અકસ્માતની ભયાનક ઘટના સામે આવી છે. જામનગર શહેરની નજીક આવેલી ઠેબા ચોકડી પાસે એક ભયાનક અકસ્માત સર્જાયો હતો. આ અકસ્માતમાં એક ટેન્કરે એક એક્ટિવાને ઠોકર મારી હતી અને એક્ટિવાને ચાલક સાથે 15 ફૂટ સુધી રસ્તા પર ઢસડી હતી. ઠેબા ચોકડી પાસે આવેલા સીસીટીવી કેમેરામાં આ સમગ્ર ઘટના કેદ થઈ ગઈ છે. આ અકસ્માતમાં ગંભીર રીતે ઘાયલ થયેલા એક્ટિવાચાલકનું ઘટનાસ્થળે જ મૃત્યુ થયું હતું. જ્યારે ટેન્કરચાલક ફરાર થઈ ગયો હતો.

ટ્રાફિક નિયમના કોઈપણ પાલન વગર ઠેબા ચોકડીએ અસ્તવ્યસ્ત રીતે વાહનો પસાર થઈ રહ્યા છે. દરમિયાન એક યુવક એક્ટિવાથી ચોકડી ક્રોસ કરવા પ્રયાસ કરતો દેખાય છે. એક્ટિવા રોડની વચ્ચોવચ પહોંચી જાય છે, ત્યારે તેની પાછળ એક ટેન્કર તેને અડફેટે લે છે. યુવક ઉછળીને રોડ પર પટકાય છે. ટેન્કર એક્ટિવાને ઘસડે છે, રોડ પર પડેલો યુવક પણ તેની સાથે ઘસડાય છે. આ બનાવ બન્યો ત્યારે સામેના રોડ પર બીજું એક ટેન્કર પણ રોડ પર વળાંક લેવા ઊભું હતું. પરંતુ ટ્રાફિકના કારણે રોડ પર રાહ જોતું દેખાયું હતું.

પ્રાપ્ત માહિતી અનુસાર, ચોકડી પર રોડ ક્રોસ કરતાં એક્ટિવાને ટેન્કરે પાછળથી ઠોકર મારતાં એક્ટિવા સાથે ચાલક રસ્તા પર ફંગોળાઈ ગયો હતો. એકિટવા ટેન્કરના ટાયર નીચે આવી ગયું હતું. ટેન્કર ચાલકે 15 ફૂટ સુધી એક્ટિવાને ઢસડ્યા બાદ બ્રેક મારી હતી. આ દરમિયાન બાઈકચાલકને ગંભીર ઈજાઓ થઈ હતી અને તેનું ઘટનાસ્થળે જ મૃત્યુ થયું હતું. હતભાગી કોણ છે એ સામે આવ્યું નથી, પોલીસ તપાસ કરી રહી છે. અકસ્માત બાદ ટેન્કરનો ચાલક ફરાર થઈ ગયો હતો.

અકસ્માતની જાણ થતાં જ પોલીસ ઘટનાસ્થળે દોડી ગઈ હતી અને તપાસ હાથ ધરી હતી. પોલીસે મૃતકનો મૃતદેહ કબજે કરી પોસ્ટમોર્ટમ માટે મોકલી આપ્યો હતો. પોલીસે ટેન્કર ચાલકની શોધખોળ શરૂ કરી છે. પોલીસે ઘટનાસ્થળ પાસેના સીસીટીવી ફૂટેજના આધારે તપાસ કરી રહી છે. અકસ્માતના કારણે થોડા સમય માટે ટ્રાફિકજામ થયો હતો, પરંતુ પોલીસે ટ્રાફિકને વહેલી તકે પુનઃ શરૂ કર્યો હતો.