રિપોર્ટ@ભરુચ: લગ્નમાં હેલિકોપ્ટર મુદ્દે બીભત્સ ટિપ્પણી કરતાં આદિવાસી સમાજમાં ભારે રોષ

અટલ સમાચાર ડોટ કોમ, ડેસ્ક 

લગ્નમાં હેલિકોપ્ટર મુદ્દે બીભત્સ ટિપ્પણી કરતાં આદિવાસી સમાજમાં ભારે રોષ ફેલાયો છે. બહોળી સંખ્યામાં સમાજના લોકોએ હાથોમાં તીર કામઠા સાથે રેલી યોજીને કલેક્ટર કચેરીએ એકત્ર થઇને આવેદનપત્ર આપી ઉગ્ર રજૂઆત કરી છે.

આ ઘટના તાજેતરમાં ભરૂચ જિલ્લાના ઝઘડિયા તાલુકાના ખરચી ગામેથી વસાવા આદિવાસી સમાજનો યુવાન ભરૂચના નિકોરા ખાતે હેલિકોપ્ટરમાં જાન લઈને લગ્ન કરવા ગયો હતો. જેનો વીડિયો સોશ્યલ મીડીયા વાયરલ થયો હતો. જેને લઈને લાલાભાઇ નામના યુવકે આદિવાસી સમાજની યુવતીઓ, માતા બહેનો પર અભદ્ર અને તુચ્છ ટિપ્પણી કરી હતી. જેથી આદિવાસી સમાજના લોકોમાં ભારે આક્રોશ ફેલાયો હતો.

આ વાત સમાજના લોકોમાં ફેલાતા આજે રોજ જિલ્લા કલેકટર અને એસપીને આવેદન આપી સોશ્યલ મીડિયામાં ટિપ્પણી કરનારને પકડી કાયદેસરની કાર્યવાહી કરવાની માગ કરી હતી. મોટી સંખ્યામાં લોકોએ સર્કિટ હાઉસ ખાતેથી હાથોમાં તીર કામઠા સાથે રેલી સ્વરૂપે કલેક્ટર કચેરી પહોંચી ભારે સુત્રોચ્ચાર સાથે કચેરી ગજવી મૂકી હતી. આ કાર્યક્રમમાં આદિવાસી નેતા મહેશ છોટુભાઈ વસાવા, દિલીપ છોટુભાઈ વસાવા સહિત સમાજના આગેવાનો ભાઈઓ - બહેનો મોટી સંખ્યામાં ઉમટી પડ્યા હતા.

આ અંગે આદિવાસી નેતા મહેશ વસાવાએ જણાવ્યું હતું કે, દેશના રષ્ટ્રપતિ આદિવાસી સમાજમાંથી આવે છે એમને મારી વિનંતી છે કે, આ સમાજ પર આવી અભદ્ર ટિપ્પણી યોગ્ય નથી. છોકરો હેલિકોપ્ટર લઇને છોકરી લેવા જાય એ ગૌરવની વાત છે. આવનારા સમયમાં વિમાન લઇને પણ જાન જોડશે. અમે મુખ્યમંત્રી અને ગૃહમંત્રીને વિનંતી છે કે આ મામલે જલ્દીથી તપાસ કરવામાં આવે. આદિવાસી સમાજ અમારો ટાઇગર છે, જંગલમાંથી ક્યારે છલાંગ મારશે એ ખબર નહીં પડે. એટલે વહિવટી તંત્રને અમારી રજૂઆત કહો કે ચેતવણી કહો.. જે કહો એ છે. આ નાલાયકને ઝડપીને કડક કાર્યવાહી કરવામાં આવે.