વહીવટ@લીમખેડા: TDO રાજમાં 3 વર્ષથી મનરેગા કૌભાંડ, એસીબી ઉતરે તો સાગઠીયાને ઝાંખા પાડતાં કૌભાંડી નિકળે

અટલ સમાચાર ડોટ કોમ, ગિરીશ જોશી 

લીમખેડા તાલુકામાં વર્ષોથી અનેક ગ્રામજનો આંતર જિલ્લા સ્થળાંતર કરે છે છતાં તાલુકા પંચાયત વર્ષે કરોડોની રકમ માત્ર મનરેગામાં રોજગારી માટે ખર્ચે છે. હવે આ બાબતે સરકારના હિતમાં તપાસનો વિષય અલગ છે પરંતુ સૌથી મોટો કૌભાંડનો સવાલ મનરેગા એક્ટની જોગવાઈ તોડવા બાબતે છે. મનરેગા કાયદાની જોગવાઇ મુજબ દરેક કામમાં/કચેરીએ લેબર અને મટીરીયલ રેશિયો જાળવવો. અહીં લીમખેડા તાલુકા વિકાસ અધિકારીના રાજમાં રેશિયોના નિયમનો સરેઆમ ભંગ છે. 60:40 નો ભંગ માત્ર નિયમની ઐસીતૈસી નથી પરંતુ ઈરાદાપૂર્વક મટીરીયલના બેફામ બીલો મૂકી કાળી કમાણી કરવાનો છે. ટીડીઓના રાજમાં છેલ્લા 3 વર્ષથી ઈરાદાપૂર્વક લેબર સામે મટીરીયલ ખર્ચ કાયદાની જોગવાઇ વિરુદ્ધ જઈને કરવામાં આવ્યો છે. એકબીજાના મેળાપીપણામાં થતાં આ વ્હાઇટ કોલર ભ્રષ્ટાચારનો આજે ભાંડો ફોડીએ.

દાહોદ જિલ્લાના લીમખેડા તાલુકામાં મનરેગાનો ખર્ચ અને કામો ખરેખર સરકારના હિતમાં તાત્કાલિક અસરથી તપાસવા જોઈએ. એક રૂપિયાનું ખોટું એ ભ્રષ્ટાચાર છે પરંતુ લીમખેડા તાલુકામાં તો કરોડોનું ખોટું સરકાર પકડી શકે છે. જાણીએ કેવી રીતે, તાલુકા પંચાયતના જવાબદારો ઈરાદાપૂર્વક મનરેગામાં સેટિંગ પાડી કરોડોના આસામી બન્યા. હવે પહેલાં મનરેગા યોજના સાથે મનરેગા કાયદાને સમજીએ તો લેબર ખર્ચ 60 ટકા કરવું અને મટીરીયલ ખર્ચ 40 ટકા કરવાનો નિયમ છે. મનરેગા રોજગારીનો કાયદો છે પરંતુ લીમખેડા તાલુકા પંચાયતવાળા રોજગારીના નામે ગેરકાયદેસર રીતે મટીરીયલના બોગસ બીલો મૂકી કરોડોનું કૌભાંડ આચરી ચૂક્યા છે અને આચરી રહ્યા છે. છેલ્લા કેટલાક વર્ષોના આંકડાનો અસલી ખુલાસો વાંચો નીચે.

મનરેગાની સત્તાવાર વેબસાઇટ મુજબ લીમખેડા તાલુકા પંચાયતે નાણાંકીય વર્ષ 2023-24 દરમ્યાન લેબર ખર્ચ 35 કરોડ કર્યું તો સામે મટીરીયલ ખર્ચ 30 કરોડ કર્યું હતુ. નાણાંકીય વર્ષ 2022-23 દરમ્યાન લેબર ખર્ચ 27 કરોડ કર્યું તો સામે મટીરીયલ ખર્ચ 24 કરોડ કર્યું હતું. જ્યારે નાણાંકીય વર્ષ 2021-22 દરમ્યાન લેબર ખર્ચ 22 કરોડ કર્યું તો સામે મટીરીયલ ખર્ચ 26 કરોડ કર્યું હતું. આ ત્રણેય વર્ષથી ઈરાદાપૂર્વક તત્કાલીન ટીડીઓ અને તેમની ટીમ મનરેગા રેશિયોનો સરેઆમ ઉલ્લંઘન કરી રહ્યા છે. હવે માત્ર નાણાંકીય વર્ષ 2020-21 દરમ્યાન જ લેબર ખર્ચ 26 કરોડ હતું અને મટીરીયલ ખર્ચ 7 કરોડ હતુ. જોકે નાણાંકીય વર્ષ 2019-20 દરમ્યાન તો લેબર ખર્ચ 8 કરોડ સામે મટીરીયલ ખર્ચ લગભગ ડબલ 14 કરોડ કર્યું હતુ‌. એક ઉદાહરણથી સમજીએ તો 10 કરોડ લેબર ખર્ચ થાય ત્યારે 4 કરોડ સુધી જ મટીરીયલ ખર્ચ થાય. આ 4 કરોડ પણ છેલ્લી મર્યાદા છે. 

સૂત્રોએ જણાવ્યું હતું કે, લીમખેડા તાલુકા પંચાયતનું એક ચોક્કસ ગૃપ અને બીજું મટીરીયલ પાર્ટીનું ગૃપ એકબીજાના મેળાપીપણામાં ઈરાદાપૂર્વક અને જાણીજોઈને લેબર સામે મટીરીયલ રેશિયોનો ભંગ કરી રહ્યા છે.‌ આ લોકો રેશિયોના ભંગને સામાન્ય ગણે છે અને તે જાળવવાનું કામ જિલ્લા અથવા રાજ્ય સ્તરે ગણાવી ચાલાકીથી બચવા પ્રયત્ન કરે છે પરંતુ ગ્રામ્ય સ્તરે જ રેશિયો તોડવામાં આવે તો ઉપરવાળા ઉપર કેવી રીતે ઢોળી શકાય? શું લીમખેડા તાલુકા પંચાયતને સ્પેશ્યલ કેસમાં રેશિયો તોડવાની છૂટ છે ? લીમખેડા તાલુકા વિકાસ અધિકારી રેશિયોની અંદર કામ કરવાથી ડરે છે ? શું રેશિયોની અંદર રોજગારી ના આપી શકાય ? શું રેશિયો જાળવીને વિકાસના કામો ના થાય ? હકીકતમાં ઈરાદાપૂર્વક લેબર ખર્ચ સામે મટીરીયલના બેફામ બીલો મૂકી આખીયે ટોળકી કરોડો રૂપિયા ભેગાં કરી રહી છે. 

અનેક સાગઠીયા મળી આવે જો એસીબી ઉતરી જાય તો...

જાણકારોના મતે લીમખેડા તાલુકાના જોબકાર્ડ ધારકો માટે મનરેગા ભલે રોજગારીનો વિષય હોય પરંતુ ટીડીઓ અને એપીઓ સહિતના માટે મનરેગા ઘી કેળા સમાન છે. જો સરકાર લીમખેડા તાલુકાના મનરેગાના એક એક કામની ઉંડાણપૂર્વકની તપાસમાં ઉતરી જાય તો એસીબી કે ઈડી મારફતે રાજકોટની જેમ લીમખેડા તાલુકામાં પણ સાગઠીયા મળી આવે તેમ છે. કેટલાક સાગઠીયા તો આ મનરેગા થકી ઘરબેઠા અથવા ખાનગી જગ્યાએ બેઠાં બેઠાં વર્ષે કરોડોની કાળી કમાણી કરી રહ્યા છે. આથી આગામી ન્યૂઝ રીપોર્ટમાં આવા કેટલા સાગઠીયા અને ક્યાં બેઠાં કરી રહ્યા કાળી કમાણી તેનો ઘટસ્ફોટ કરીશું તો સાથે અગાઉ પણ કેટલા સાગઠીયા કરી ચૂક્યા કાળી કમાણી તે પણ જાણવા પ્રયત્ન કરીશુ.