બનાવ@વડોદરા: કન્ટેનર કાર પર ચઢી ગયું, 4 લોકોનો માંડ-માંડ જીવ બચ્યો

અટલ સમાચાર ડોટ કોમ, ડેસ્ક 

વડોદરાની કપુરાઇ ચોકડી પાસે સર્જાયેલા ભયાવહ અકસ્માતમાં ચાર લોકોનો માંડ-માંડ જીવ બચ્યો છે. હાઇવે પર કાર પર આખેઆખું કન્ટેનર કાર પર ચડી જતાં કાર સેન્ડવિચ બની ગઈ હતી અને​​​​​​ ચારમાંથી ત્રણ લોકો ફસાઈ ગયા હતા.

આ અંગેનો કોલ મળતા જ ફાયર વિભાગ અને પોલીસની ટીમો તાત્કાલિક ઘટનાસ્થળે પહોંચી રેસ્ક્યૂની કામગીરી હાથ ધરી હતી. કારમાં રહેલા ત્રણ લોકોને ફાયર વિભાગે ભારે જહેમત બાદ રેસ્ક્યૂ કરી બહાર કાઢ્યા હતા.

વડોદરા શહેર પાસેથી પસાર થતા હાઈવે પર તરસાલી બ્રિજથી કપુરાઇ ચોકડી તરફ આવતા ભયાનક અકસ્માત થયો હતો. જેમાં સુરત તરફથી આવતી કાર ઉપર કન્ટેનર ચડી જતા કારનો કચ્ચરઘાણ નીકળી ગયો હતો. આ કારમાં કુલ ચાર વ્યક્તિ સવાર હતા, જેમાંથી એક વ્યક્તિ બહાર નીકળી ગયો હતો અને અન્ય ત્રણ વ્યક્તિ કારમાં જ ફસાયા હતા. પોલીસ અને ફાયર વિભાગની ટીમો દ્વારા ક્રેનની મદદ લઈ કન્ટેનરને હટાવી તેમાંથી ત્રણ વ્યક્તિનું દિલધડક રેસ્ક્યૂ કર્યું હતું. જોકે, આ ઘટનામાં ચમત્કાર થયો હોય તેમ એક પણ વ્યક્તિને મોટી ઈજા થઈ નથી.