વિરોધ@ગુજરાત: કોંગ્રેસ કાર્યકરો બેરિકેટિંગ તોડીને પોલીસ ભવનમાં ઘૂસ્યા, જાણો સમગ્ર મામલો

અટલ સમાચાર ડોટ કોમ, ડેસ્ક 

ગુજરાતમાં પોલીસ દમન, તાનાશાહી અને કથિત ખોટા પોલીસ કેસોના વિરોધમાં ગુજરાત પ્રદેશ કોંગ્રેસ દ્વારા આજે ગાંધીનગર સ્થિત ગુજરાત પોલીસ ભવન ખાતે આવેદનપત્ર આપવાનો કાર્યક્રમ યોજવામાં આવ્યો છે. ગાંધીનગરમાં અમિત ચાવડા-મેવાણીની આગેવાનીમાં મોટી સંખ્યામાં કાર્યકરો ઉમટ્યા છે. કોંગ્રેસના કાર્યકરોએ પોલીસ સાથે ઝપાઝપી કરી હતી. તેમજ બેરિકેટિંગ તોડી, પોલીસ ભવનમાં ઘૂસ્યા હતા.

કોંગ્રેસના જણાવ્યા અનુસાર, ભાજપના ઈશારે રાજ્યમાં પોલીસ દમન અને કથિત ખોટા પોલીસ કેસો થઈ રહ્યા હોવાના વિરોધમાં આ કાર્યક્રમનું આયોજન કરવામાં આવ્યું છે. આ કાર્યક્રમમાં મોટી સંખ્યામાં કોંગ્રેસના કાર્યકર્તાઓ ગાંધીનગરમાં ઉમટ્યાં છે. કાર્યકરોએ પોલીસ પ્રશાસન મુર્દાબાદના નારા લગાવ્યા હતા. કરશનદાસ બાપુ ભાદરકાએ જણાવ્યું કે, ગુજરાત સર મુખત્યારશાહીઓના હાથમાં આવી ગયું છે, આજે એક એક ગુજરાતી દુઃખી છે. ભાજપ સત્તાના નકારાત્મક નશામાં એ રીતે આવી ગઈ છે કે ગમે એના ઉપર એફઆઈઆર કરી દે છે. બીજી તરફ હેમાંગ મહિપતરામ રાવલે ગુજરાતમાં કોંગ્રેસના કાર્યકરો પર પોલીસ દ્વારા દમન કરવામાં આવી રહ્યું હોવાના આક્ષેપ કર્યા છે.