રિપોર્ટ@વલસાડ: સેલવાસના દૂધની રોડ પર ગમખ્વાર અકસ્માત સર્જાયો, 4નાં મોત

અટલ સમાચાર ડોટ કોમ, ડેસ્ક 

રાજ્યમાં અકસ્માતના બનાવો ખુબજ વધી ગયા છે. ફરી અકસ્માતની ભયાનક દુર્ઘટના સામે આવી છે. સેલવાસના દૂધની રોડ પર ગમખ્વાર અકસ્માત સર્જાવાની ઘટના સામે આવી છે. અકસ્માતની આ ઘટનામાં કારમાં સવાર સુરતના 5 પૈકી 4 મિત્રોના ઘટનાસ્થળે જ મોત થયા છે.

આ ગંભીર અકસ્માતની મળતી માહિતી મુજબ સુરતના પાંચ મિત્રો કાર નં. (GJ-05-JP-6705) લઇને સુરતથી સંઘ પ્રદેશ દાદરા નગર હવેલીના દૂધનીના પ્રવાસે આવ્યા હતા. જ્યાં ફરીને પરત સુરત આવવા રવાના થયા હતા. જે દરમિયાન ખાનવેલ તરફ જઇ રહ્યા હતા. તે સમયે ઘાટ ઊતરતી વખતે કારચાલકે સ્ટીયરિંગ પર કાબૂ ગુમાવ્યો હતો.

કારચાલકે સમય સૂચકતા વાપરી મોટી દુર્ઘટના ટાળવા માટે ઘાટ ઉપરના મોટા પથ્થર સાથે કાર અથડાવી અકસ્માત સર્જ્યો હતો. જોકે, કમનસીબે કાર ચાર-પાંચ પલટી મારીને નીચે ઘાટમાં ઊતરી જતાં કારનો કચ્ચરઘાણ વળી ગયો હતો. જેમાં કારમાં સવાર 5પૈકી 4 યુવકોના ઘટનાસ્થળે જ મોત થયા હતા. જ્યારે એક યુવક ઇજાગ્રસ્ત થયો હતો.

આ અકસ્માતની ઘટના જોતા સ્થાનિક લોકોએ દોડી આવી પોલીસ અને એમ્બ્યુલન્સને જાણ કરી હતી. આ અકસ્માત એટલો ગંભીર હતો કે કારમાં ફસાયેલા મૃતદેહોને પતરાં ચીરીને બહાર કાઢવામાં આવ્યા હતા. પોલીસે ચારેય મૃતદેહોને પી.એમ. અર્થે અને ઇજાગ્રસ્ત યુવકને સારવાર અર્થે ખસેડીને આગળની તપાસ હાથ ધરી છે.