રિપોર્ટ@સુરત: ફર્નિચરના ગોડાઉનોમાં અચાનક ભીષણ આગ ભભૂકી ઉઠતા સમગ્ર વિસ્તારમાં દોડધામ મચી

અટલ સમાચાર ડોટ કોમ, ડેસ્ક 

સુરત શહેરના ગોડાદરાના દેવદ ગામ પાસે આવેલા પતરાના શેડમાં કાર્યરત ફર્નિચરના ગોડાઉનોમાં અચાનક ભીષણ આગ ભભૂકી ઉઠતા સમગ્ર વિસ્તારમાં દોડધામ મચી ગઈ હતી. આગ એટલી વિકરાળ હતી કે, તેના ધુમાડાના ગોટેગોટા દૂર-દૂર સુધી જોવા મળ્યા હતા.

મળતી માહિતી મુજબ, દેવદ ગામમાં આવેલા પતરાના શેડમાં ફર્નિચર બનાવવાનું તેમજ સંગ્રહ કરવાનું કામ ચાલતું હતું. આજે અચાનક કોઈ અગમ્ય કારણોસર એક ગોડાઉનમાં આગ લાગી હતી. ફર્નિચર બનાવવા માટે વપરાતા લાકડા, ગુંદર અને કેમિકલ જેવા જ્વલનશીલ પદાર્થોને કારણે આગે જોતજોતામાં રૌદ્ર સ્વરૂપ ધારણ કરી લીધું હતું. આ ભીષણ આગની ઝપેટમાં એકથી વધુ ગોડાઉન આવ્યા હોવાની આશંકા સેવાઈ રહી છે.

આગની જાણ થતા જ સુરત ફાયર વિભાગનો મોટો કાફલો તાત્કાલિક ઘટનાસ્થળે દોડી ગયો હતો. કુલ 6 ફાયર સ્ટેશનની 10 થી વધુ ગાડીઓ ઘટનાસ્થળે પહોંચી છે. ફાયર ફાઈટરો દ્વારા સતત પાણીનો મારો ચલાવી આગ પર કાબૂ મેળવવાના પ્રયાસો તેજ કરવામાં આવ્યા છે. પતરાના શેડ હોવાને કારણે આગ બુઝાવવામાં ભારે જહેમત ઉઠાવવી પડી રહી છે.

આગને પગલે આસપાસના રહેણાંક અને અન્ય કોમર્શિયલ એકમોમાં અફરાતફરીનો માહોલ સર્જાયો હતો. આગના પગલે મોટી સંખ્યામાં લોકો ઉમટી પડ્યા હતા. આ સાથે રસ્તે જતા લોકો પણ ઊભા રહી ગયા હતા. સદનસીબે, હાલ સુધી કોઈ જાનહાનિના સમાચાર પ્રાપ્ત થયા નથી, પરંતુ ફર્નિચરના જથ્થાને કારણે મોટા પાયે આર્થિક નુકસાન થયું હોવાનું અનુમાન છે.

નોંધનીય છે કે, અગાઉ પણ ગોડાદરા વિસ્તારમાં પતરાના શેડમાં આગ લાગવાની ગંભીર ઘટનાઓ બની ચૂકી છે. વારંવાર બનતી આવી ઘટનાઓને પગલે ફાયર સેફ્ટીના નિયમોના અમલીકરણ સામે પણ સવાલો ઉઠી રહ્યા છે.

ડેપ્યુટી ચીફ ફાયર ઓફિસર પ્રકાશભાઈએ જણાવ્યું હતું કે, આ ફર્નિચરનું ગોડાઉન છે અને ફર્નિચરના ગોડાઉનમાં આગ લાગી છે. સાંજે 6:44 કલાકે આ અંગેનો કોલ મળ્યો હતો. અત્યારે અહીંયા 22થી 25 જેટલી ગાડીઓ પહોંચી ગઈ છે અને 40 થી 50 ફાયર ફાઇટરો કામ કરી રહ્યા છે. બધા અધિકારીઓ પણ અહીંયા હાજર છે. હવે આગ પર 90 ટકા કાબૂ મેળવી લેવામાં આવ્યો છે, થોડી ઘણી જ્વાળાઓ દેખાય છે તેને પણ શાંત કરવામાં આવી રહી છે.