રિપોર્ટ@રાજકોટ: સહારા યુનાઈટ નામની પ્લાસ્ટિકની ફેક્ટરીમાં અચાનક આગ ફાટી નીકળી

અટલ સમાચાર ડોટ કોમ, ડેસ્ક 

રાજકોટ જિલ્લાના પડધરી પાસે આવેલી સહારા યુનાઈટ નામની પ્લાસ્ટિકની એક ફેક્ટરીમાં રાત્રિના સમયે અચાનક આગ ફાટી નીકળી હતી. ફેક્ટરીના મેદાનમાં પ્લાસ્ટિકનો મોટા પ્રમાણમાં જથ્થો પડ્યો હોઇ આગે ગણતરીની મિનિટોમાં જ વિકરાળ સ્વરૂપ ધારણ કરી લીધું હતું. ઘટનાની જાણ થતાં પડધરી પોલીસ અને રાજકોટથી ફાયરબ્રિગેડની ટીમો ઘટનાસ્થળે પહોંચી આગ પર કાબૂ મેળવવાના પ્રયાસો હાથ ધર્યા હતા.

રાત્રિના સમયે પ્લાસ્ટિક ફેક્ટરીમાં આગ લાગ્યા બાદ સવારે 9 વાગ્યા સુધીમાં આગ પર સંપૂર્ણ કાબૂ મેળવી શકાયો નથી. રાજકોટ ઉપરાંત ગોંડલ, મોરબી અને જામનગરથી ફાયરબ્રિગેડની ટીમો પણ ઘટનાસ્થળ પર પહોંચી છે અને પાણીનો મારો ચલાવી આગ પર કાબૂ મેળવવાનો પ્રયાસ કરી રહી છે. સવાર સુધીમાં આગ પર 70 ટકા કાબૂ આવી ગયો હોવાનું જાણવા મળ્યું છે. બપોર સુધીમાં આગ પર સંપૂર્ણ કાબૂ મેળવી લેવાય તેવી શક્યતા છે.

પ્લાસ્ટિક ફેક્ટરીમાં મોટા પ્રમાણમાં તૈયાર પ્લાસ્ટિક અને રો-મટીરિયલ પડ્યું હતું. જે આગમાં બળીને ખાખ થયું હતું. આગ પર સંપૂર્ણ કાબૂ મેળવી લેવાયા બાદ નુકસાનીનો આંક જાણવા મળશે. આગ લાગવાનું કારણ પણ હાલ સામે આવ્યું નથી.