રિપોર્ટ@ગુજરાત: મુંબઈ-અમદાવાદ હાઇવે પર 5 વાહન વચ્ચે અકસ્માત, જાણો સમગ્ર બનાવ

અટલ સમાચાર ડોટ કોમ, ડેસ્ક 

રાજ્યમાં અકસ્માતની ઘટનાઓ ખુબજ વધી ગઈ છે. આજરોજ વધુ એક અકસ્માતની ઘટના બની હતી. માંગરોળ તાલુકાના ધામડોદ ગામ પાસે એક પછી એક 5 વાહન વચ્ચે અકસ્માત સર્જાયો હતો, જેને લઈને નાસભાગ મચી ગઇ હતી. ત્રણ કાર અને બે ટ્રક વચ્ચે જોરદાર ટક્કર થતાં હાઇવે પર ભારે ટ્રાફિકજામ થયો હતો.

ઘટનાને પગલે સુરત જિલ્લા ટ્રાફિક અને NHAI વિભાગની ટીમ તાત્કાલિક સ્થળ પર દોડી ગઈ હતી અને વાહનોને ક્રેનની મદદથી હાઈવેની સાઈડમાં કરવાની કામગીરી હાથ ધરી હતી. અકસ્માતની ઘટનામાં કોઈ મોટી જાનહાનિ ન થતાં સૌકોઈએ રાહતનો શ્વાસ લીધો હતો.

સુરત જિલ્લા ટ્રાફિક PSI ઈશ્વરસિંહ સિસોદિયાએ જણાવ્યું હતું કે, પાંચ વાહન વચ્ચે આ અકસ્માત સર્જાયો હતો. ઘટનાને પગલે અમારી ટીમ તાત્કાલિક સ્થળ પર દોડી ગઈ હતી. વાહનોને હાઇવેની સાઈડ કરવા ક્રેનની પણ મદદ લેવામાં આવી હતી. જે બાદ ટ્રાફિક હળવો થાય એ દિશામાં કામગીરી કરાઈ હતી.