રિપોર્ટ@ગુજરાત: કચ્છ અને બંગાળની ખાડીમાં વરસાદની સિસ્ટમ સક્રિય થઈ, જાણો વધુ વિગતે

અટલ સમાચાર ડોટ કોમ, ડેસ્ક 

હાલમાં નવરાત્રિનો પવિત્ર તહેવાર ચાલી રહ્યો છે. હવામાન વિભાગે આગામી 7 દિવસ એટલે કે 25 સપ્ટેમ્બરથી 1 ઓક્ટોબર સુધી, વરસાદની આગાહી જાહેર કરી છે. ખાસ કરીને દક્ષિણ ગુજરાતના વિસ્તારોમાં આગામી 24 કલાક બાદ ગાજવીજ સાથે ભારે વરસાદની શક્યતા વ્યક્ત કરવામાં આવી છે. હવામાન વિભાગના જણાવ્યા અનુસાર, રાજ્યમાં હાલ બે અલગ-અલગ વરસાદી સિસ્ટમ સક્રિય છે, જેના કારણે આ વરસાદની સ્થિતિ સર્જાઈ શકે છે.

હવામાન વિભાગના ડાયરેક્ટર ડૉ. એ. કે. દાસે જણાવ્યું કે, એક વરસાદી સિસ્ટમ કચ્છ અને તેની આસપાસના વિસ્તારોમાં અપર એર સાયક્લોનિક સર્ક્યુલેશનના રૂપમાં સક્રિય છે. આ ઉપરાંત, બંગાળની ખાડીમાં એક લો પ્રેશર એરિયા પણ સક્રિય છે, જે આગામી 12 કલાકમાં ડિપ્રેશનમાં પરિવર્તિત થઈ શકે છે. આ બંને સિસ્ટમના કારણે રાજ્યના વિવિધ ભાગોમાં વરસાદની શક્યતા છે, જેમાં દક્ષિણ ગુજરાતમાં ભારે વરસાદની આગાહી કરવામાં આવી છે.

રાજ્યના મોટાભાગના જિલ્લાઓમાંથી દક્ષિણ પશ્ચિમ ચોમાસું વિદાય લઈ ચૂક્યું છે. અમદાવાદ, સૌરાષ્ટ્ર અને કચ્છના વિવિધ જિલ્લાઓમાં ચોમાસાનો અંત આવી ગયો છે. જોકે, હાલની વરસાદી સિસ્ટમોને કારણે રાજ્યમાં વરસાદની પ્રવૃત્તિ ફરી સક્રિય થઈ શકે છે. હવામાન વિભાગે નાગરિકોને આગામી દિવસોમાં સાવચેત રહેવા અને જરૂરી તૈયારીઓ કરવા અપીલ કરી છે.

દક્ષિણ ગુજરાતના જિલ્લાઓમાં આગામી 24 કલાક બાદ ભારે વરસાદની આગાહીને ધ્યાનમાં રાખીને સ્થાનિક વહીવટી તંત્રને પણ સતર્ક કરવામાં આવ્યું છે. ગાજવીજ સાથેના વરસાદને કારણે નીચાણવાળા વિસ્તારોમાં પાણી ભરાવાની શક્યતા રહેલી છે, જેને લઈને નાગરિકોને સાવચેતી રાખવા જણાવવામાં આવ્યું છે.