રિપોર્ટ@અમદાવાદ: ક્રાઈમ બ્રાન્ચે સરખેજ નજીકથી 1 કરોડનું MD ડ્રગ્સ ઝડપ્યું

અટલ સમાચાર ડોટ કોમ, ડેસ્ક 

અમદાવાદ ક્રાઈમ બ્રાન્ચે સરખેજ નજીકથી અંદાજે એક કરોડથી વધુની કિંમતનું 1 કિલો MD  ડ્રગ્સ ઝડપી પાડ્યું છે. ડ્રગ્સ માફિયાઓએ આ વખતે ડ્રગ્સ છુપાવવા માટે નવી મોડસ ઓપરેન્ડી અપનાવી છે. કારના ટાયરમાં ડ્રગ્સ છુપાવેલું હતું. પોલીસે ટાયર ખોલી પહેલા ટ્યૂબ બહાર કાઢી હતી. બાદમાં અંદર ટાયર ફરતે હાથ ફેરવ્યો તો બે પેકેટમાં એક કરોડનું એક કિલો એમડી ડ્રગ્સ મળી આવ્યું હતું.

સામાન્ય રીતે એમડી ડ્રગ્સનો ઉપયોગ યુવા લોકો મોટાભાગે કરી રહ્યા છે. ત્યારે આ વેપાર કઈ રીતે અને કોના દ્વારા ચલાવવામાં આવતો હતો તેને શોધવા માટે પણ પોલીસે પ્રયાસ શરૂ કર્યા છે. અમદાવાદ ક્રાઈમ બ્રાન્ચના આ મોટા ઓપરેશનમાં બે આરોપીની ધરપકડ કરવામાં આવી છે.

સૂત્રો પાસેથી મળતી માહિતી પ્રમાણે ગઈકાલે મોડીરાતથી સવાર સુધી સરખેજ વિસ્તારમાં કેટલાક લોકો મોટા જથ્થામાં MD ડ્રગ્સ સંતાડીને રાખ્યું હોવાની બાતમીના આધારે અલગ અલગ જગ્યાએ સર્ચ અને રેડ કરવામાં આવી હતી. આ સમગ્ર મામલે તપાસ આગળ વધી ત્યારે બે શંકમદોની અટકાયત કરાઈ હતી. જેમાંથી આ લોકો પાસેથી અંદાજે 1 કિલો MD ડ્રગ્સનો જથ્થો મળી આવ્યો હતો. આ એમડી ડ્રગ્સ મોટા જથ્થામાં લાવીને નાના નાના પેડલરો મારફતે અલગ અલગ વિસ્તારમાં પહોંચાડવામાં આવે છે. સામાન્ય રીતે આગામી સમયમાં નવરાત્રિ જેવા તહેવારો આવે છે અને આ સમયે એમડી ડ્રગ્સનો ઉપયોગ વધારે થતો હોય તેવી પણ શંકાના આધારે તપાસ હાથ ધરાઈ છે.

MD  ડ્રગ્સ અલગ અલગ રૂટથી અમદાવાદ આવતું હોય છે. જેની પાછળ પણ અનેક કડીઓ જોડાયેલી હોય છે. હવે આના રૂટ અને કોણે ડિલિવરી મગાવી હતી તે સમગ્ર મામલે અમદાવાદ ક્રાઈમ બ્રાન્ચે તપાસ હાથ ધરી છે.