રિપોર્ટ@સુરત: યુફોરિયા હોટલમાં પાણીમાં પડતાં બાળકનું મોત, સમગ્ર બનાવ જાણો

અટલ સમાચાર ડોટ કોમ, ડેસ્ક 

માતા-પિતા માટે આંખ ઉઘાડનારો કિસ્સો સામે આવ્યો છે. સુરતના પાલ વિસ્તારમાં યુફોરિયા હોટલમાં દોઢ વર્ષનું બાળક રમતાં રમતાં પાણીમાં પડી ગયું. 15 મિનિટ સુધી બાળક પાણીમાં રહેતાં તેનું મોત થયુ છે. પિતા વિજયભાઈ પત્ની અને બાળક ક્રિશિવ સાથે હોટલમાં એક પાર્ટીમાં ગયા હતા.

બેન્ક્વેટ હોલમાં પાર્ટી ચાલતી હતી ત્યારે બાળક અચાનક રમતા રમતા બહાર નીકળી ગયુ અને ત્યાં પાસે આવેલા વોટર પોન્ડમાં પડી ગયું. પાણીમાં ડૂબતા બાળકનું મોત થયું છે.

યોગીચોકના શુભમ રેસિડેન્સી ખાતે રહેતા વિજય સાવલિયા પારિવારિક પાર્ટીમાં પાલ ખાતે આવેલા યુફોરિયા રેસ્ટોરન્ટમાં આવ્યા હતા. હોટલના બેન્કવેટ હોલમાં પાર્ટી ચાલી રહી હતી અને જમવાનું શરૂ થવાનું હતું. આ દરમિયાન વિજયભાઈનો દોઢ વર્ષનો નાનો પુત્ર ક્રિશિવ રમતાં રમતાં બહાર નીકળી ગયો અને બેન્કવેટ હોલની બહાર આવેલા વોટર પોન્ડમાં પડી ગયો.

બેન્કવેટ હોલમાં કોઇને ખબર નહોતી કે બાળક ક્યાં છે. જ્યારે બેન્કવેટ હોલમાં બાળકની શોધખોળ ચાલી રહી હતી એ દરમિયાન બેન્કવેટ હોલની બહાર બેઠેલા એક ગ્રાહકની નજર બાળક પર પડી. તેમણે તાત્કાલિક લોકોને જાણ કરી. હોટલના સંચાલકો ક્રિશિવને બહાર કાઢવા માટે દોડી આવ્યા. બાળકને બહાર કાઢવામાં આવ્યો, પરંતુ તે બેભાન હતો. તેને તાત્કાલિક હોસ્પિટલ લઈ જવામાં આવ્યો ત્યાં બાળકને મૃત જાહેર કરાયો હતો.

સમગ્ર ઘટના અંગે હોટલના મેનેજર હસનભાઈ રાબડીએ જણાવ્યું હતું કે બાળક વોટર પોન્ડમાં પડી ગયું હતું. બહાર બેઠેલા એક કસ્ટમર દ્વારા અમને જાણ કરવામાં આવી હતી. મેં તાત્કાલિક બાળકને બહાર કાઢ્યું અને તેનાં પરિવારજનો તેને હોસ્પિટલ લઈ ગયા હતા.