અટલ સમાચાર ડોટ કોમ, ડેસ્ક 

રાજ્યમાં નકલી ચીજ-વસ્તુઓના કેસ ખુબજ વધી ગયા છે. સુરતમાંથી ડુબલીકેટ તંબાકુ મિશ્રિત ગુટકા, કેમિકલ મિશ્રિત પાન-મસાલાના પાઉચ સહિતનો ગુટકાનો જથ્થો ઝડપાયો છે. ગુટકાના પાઉચ ઉપર કોઈ જગ્યાએ સહેલાઈથી દેખાઈ શકે તે રીતે ચેતવણીની છાપ કે લખાણ વગરના 6 કરોડના મુદ્દામાલને પ્રિવેન્શન ઓફ ક્રાઈમ બ્રાન્ચ (PCB) દ્વારા ઝડપી પાડવામાં આવ્યો છે. આ મુદ્દામાલ આરોપીઓ દિલ્હીથી લઈને આવ્યા હતા અને આજ તો તેઓ મુંબઈ મોકલવાના હતાં, પરંતુ PCBએ દરોડો પાડીને મુદ્દામાલ સાથે ત્રણની ધરપકડ કરી છે.

સુરત PCBને બાતમી મળી હતી કે, ગુજરાતમાં પ્રતિબંધીત ડુપ્લિકેટ ગુટકા અને પાન-મસાલા ભરેલી ટ્રક દિલ્હીથી સુરત આવે છે. આ જથ્થો સારોલી વિસ્તારમાં આવેલા પ્રિન્સ એસ્ટેટના ક્રિયા શક્તિ લોજિસ્ટિકમાં છુપાવવામાં આવ્યો છે. આ માહિતીના આધારે PCBએ અલગ-અલગ ટીમો બનાવી ક્રિયા શક્તિ લોજિસ્ટિક પર દરોડા પાડ્યા હતા. આ દરમિયાન એક નહિ, પરંતુ પાંચ ટ્રકમાં ભરાઈને આવેલો પ્રતિબંધીત ગુટકાનો જથ્થો મળી આવ્યો હતો. પોલીસે ગોડાઉનમાંથી કુલ 6 કરોડની કિંમતનો જીવલેણ ગુટકાનો જથ્થો કબજે કર્યો હતો અને ત્રણ આરોપીની ધરપકડ કરી હતી.

પોલીસ પૂછપરછમાં આરોપીઓએ પોતાના નામ સંજય શર્મા, સંદીપ નેણ અને વિશાલ જૈન જણાવ્યું હતું. તેઓ છેલ્લા ત્રણ મહિનાથી અહીં ડુપ્લિકેટ ગુટકાનું ગોડાઉન ચલાવતા હોવાનું પોલીસ સમક્ષ સામે કબુલાત કરી હતી. આ સાથે મહાવીર નેણ અને અનિલ યાદવ નામના બંને શખસ દિલ્હીથી આ ડુપ્લિકેટ ગુટકા સુરત મોકલતા હોવાનું પણ કબુલાત કરી હતી. જેથી પોલીસે આ બંને આરોપીને વોન્ટેડ જાહેર કરી તેમની શોધખોળ હાથ ધરી છે.

દિલ્હીથી આ ડુપ્લિકેટ ગુટકા અને કેમિકલ યુક્ત પાન-મસાલા મહારાષ્ટ્ર અને મુંબઈમાં મોકલવામાં આવતા હતાં. જે બાદ રાજ્યોના અલગ-અલગ શહેરોમાં ડિસ્ટ્રીબ્યુટ કરાતા હતા. આ નેટવર્કમાં અનેક લોકો સામેલ છે, જે અંગેની પોલીસ દ્વારા તપાસ કરવામાં આવી રહી છે. હાલ પોલીસના તપાસમાં જાણવા મળ્યું છે કે, છેલ્લા ત્રણ મહિનાથી આ નેટવર્ક આરોપીઓ ચલાવી રહ્યા હતા. આ ડુબલીકેટ ગુટકાનો જથ્થો દિલ્હીથી સુરત સારોલી ટ્રાન્સપોર્ટના ગોડાઉનમાં આવતો હતો અને ત્યાંથી મુંબઈ મોકલવામાં આવતો હતો.

કોઈપણ પુરાવા વગર દિલ્હીથી વોન્ટેડ આરોપી મહાવીર રખારામ નેણ આ ડુપ્લિકેટ ગુટકાનો જથ્થો ક્રિયા શક્તિ લોજિસ્ટિકના ટ્રાન્સપોર્ટમાં સુરત મોકલી આપ્યો હતો. જે જથ્થો પકડાઈ જતા આરોપી ગોડાઉનના ઇન્ચાર્જ સંજય સીતારામ શર્મા, ગોડાઉન અને ટ્રાન્સપોર્ટના વાહનોને પણ પોલીસે ઝડપી પાડ્યા છે. આ સમગ્ર મામલે રાજસ્થાનના ઝૂંઝનું જિલ્લાના સંજય સીતારામ શર્મા, રાજસ્થાનના હનુમાનગઢના સંદીપ નેણ અને ઉત્તર પ્રદેશના ફિરોઝાબાદના વિશાલ જૈન વિરુદ્ધ પોલીસે ફરિયાદ નોંધી છે.

આ તંબાકુ, મિશ્રિત ગુટકા અને કેમિકલ મિશ્રિત પાન-મસાલા ખાવાથી જીવલેણ બીમારીથી માનવીનું મૃત્યુ થવાની પૂરેપૂરી સંભાવના છે. આ ગુટકાના પાઉચ ઉપર કોઈ જગ્યાએ સહેલાઈથી દેખાઈ શકે કે વંચાઈ શખે તેમ કોઈ પણ ચેતવણી કે છાપ નહોંતી. સામાન્ય રીતે ક્રોસબોન વર્ડ વોર્નિંગ કે કેન્સરની બીમારી દર્શાવતી કોઈ છાપ કે છબી હોય છે, પરંતુ આ મુદ્દામાલમાં ક્યાંક પણ તેઓએ છાપેલ નથી.