રિપોર્ટ@જૂનાગઢ: દિવાળીની રાત્રિ રક્તરંજિત બની, ફટાકડા ફોડવાની ના પાડતાં યુવકનું ઢીમ ઢાળી દીધું
અટલ સમાચાર ડોટ કોમ, ડેસ્ક
દિવાળીની રાત્રિ રક્તરંજિત બની.ફટાકડા ફોડવાની ના કહેવા બદલ અમૂલ એપાર્ટમેન્ટ નજીક 28 વર્ષીય યુવક દિવ્યેશ ચૂડાસમા પર એક મહિલા સહિત ત્રણથી વધુ લોકોએ પાઇપ, ધોકા અને લાકડીના ઘા ઝીંકીને જીવલેણ હુમલો કર્યો હતો. ગંભીર રીતે લોહીલુહાણ થયેલા યુવકનું હોસ્પિટલ પહોંચે એ પહેલાં જ રસ્તામાં કરુણ મૃત્યુ નીપજ્યું હતું. ઘટના બન્યાની ગણતરીની મિનિટોમાં જ એક મહિલા સહિત ત્રણ શકમંદની ધરપકડ કરી પોલીસે વધુ પૂછપરછ હાથ ધરી છે. આ હત્યાને કારણે અગાઉ ભાઈને ગુમાવી ચૂકેલા અને પિતાનું નિધન થતાં એકલા રહેતા દિવ્યેશનાં વૃદ્ધ માતા પર આભ ફાટી પડ્યું છે.
મોડીરાત્રે મધુરમ વિસ્તાર નજીક રોડની બંને બાજુએ લોકો ફટાકડા ફોડી રહ્યા હતા. આ સમયે અમૂલ એપાર્ટમેન્ટ નજીક ફટાકડા ફોડવાની બાબતે 28 વર્ષીય દિવ્યેશ ચૂડાસમાની અમૂલ એપાર્ટમેન્ટમાં રહેતી વ્યક્તિ વચ્ચે ઉગ્ર માથાકૂટ થઈ હતી. આ ઝઘડામાં ઉશ્કેરાયેલી એક મહિલા સહિત ત્રણથી વધુ લોકોએ દિવ્યેશ પર લાકડી, પાઇપ અને ધોકા વડે અચાનક જીવલેણ હુમલો કરી દીધો હતો. હુમલામાં મૃતક દિવ્યેશનો મિત્ર નિશિત રાહુલભાઈ વાઘેલા નામનો યુવક પણ ઈજાગ્રસ્ત થયો હોવાથી તેને તાત્કાલિક સારવાર માટે જૂનાગઢ સિવિલ હોસ્પિટલ ખસેડવામાં આવ્યો હતો. પ્રાથમિક તપાસમાં સામે આવ્યું કે મૃતકના માથામાં તીક્ષ્ણ હથિયારના ઘા લાગવાથી તે લોહીલુહાણ થયો હતો.
આરોપીઓએ કરેલા ઘાતક હુમલાને કારણે યુવક દિવ્યેશ ચૂડાસમા ગંભીર રીતે લોહીલુહાણ થયો હતો. ઘટનાની જાણ થતાં જ મધુરમ રોડ પર લોકોનાં ટોળેટોળાં એકત્રિત થયાં હતાં. આસપાસના લોકોએ ઇજાગ્રસ્ત યુવાનને તાત્કાલિક સારવાર માટે જૂનાગઢની ખાનગી હોસ્પિટલમાં ખસેડ્યો હતો, પરંતુ યુવકની સારવાર શરૂ થાય એ પહેલાં જ રસ્તામાં જ તેનું કરુણ મૃત્યુ નીપજ્યું હતું.
મધુરમ વિસ્તારમાં બનેલી આ હત્યાની ગંભીર ઘટનાની જાણ થતાં જ જૂનાગઢ સી-ડિવિઝન પોલીસના DySP સહિતનો કાફલો ઘટનાસ્થળે તાત્કાલિક પહોંચી ગયો હતો. પોલીસે જે સ્થળે આ ઘટના બની હતી એની આસપાસના સીસીટીવી ફૂટેજની તપાસ શરૂ કરી હતી અને સ્થાનિકોની પૂછપરછના આધારે ગણતરીની મિનિટોમાં જ આ ગુનાને અંજામ આપનાર એક મહિલા સહિતના ત્રણ શકમંદની ધરપકડ કરી હતી. ત્રણેય શકમંદને સી-ડિવિઝન પોલીસ મથકે વધુ પૂછપરછ માટે લઈ જવામાં આવ્યા હતા.
મૃતક 28 વર્ષીય યુવક દિવ્યેશ ચૂડાસમા તેની માતા સાથે રહેતો હતો અને પ્રાઇવેટ જોબ કરીને ઘર ચલાવતો હતો. આ પરિવાર પર દિવાળીની રાત પહેલાં પણ બે મોટી આફત આવી ચૂકી હતી. થોડા સમય પહેલાં જ દિવ્યેશના ભાઈએ આત્મહત્યા કરી હતી અને તેના આઘાતમાં પિતાનું લાંબી બીમારી બાદ નિધન થયું હતું. બે મા-દીકરા એકલવાયું જીવન જીવતાં હતાં, ત્યારે હવે દિવાળીની રાત્રે એકના એક પુત્રના અકાળે મોતે વૃદ્ધ માતા પર આભ ફાટી પડ્યા જેવો ઘેરો આઘાત પહોંચાડ્યો છે.
