રિપોર્ટ@ગુજરાત: ખાનગી બસની અડફેટે એક વ્યક્તિ મોતને ભેટ્યો, સમગ્ર દુર્ઘટના જાણો

અટલ સમાચાર ડોટ કોમ, ડેસ્ક 

આજે સવારે વિજય ચાર રસ્તા પાસે ખાનગી બસની અડફેટે એક વ્યક્તિ મોતને ભેટ્યો હોવાની વિગત સામે આવતા ટ્રાફિક પોલીસ બનાવ સ્થળે પહોંચી હતી અને કાર્યવાહી શરૂ કરી છે. અકસ્માત કયા કારણસર થયો હતો તે જાણવા માટે પ્રયાસ હાથ ધર્યા છે, અકસ્માતના પગલે ફરીથી ટ્રાફિક વ્યવસ્થા સામે પ્રશ્નો ઊભા થયા છે.

સૂત્રો પાસેથી મળતી માહિતી પ્રમાણે, આજે સવારે વિજય ચાર રસ્તા પાસેથી ગાંધીનગરનો રહેવાસી રામચંદ્ર રાય નામનો યુવક બાઈક લઈને પસાર થઈ રહ્યો હતો. તે સમયે એક ખાનગી બસ ફુલ ઝડપે આવી રહી હતી અને તેણે બાઈકચાલકને અડફેટે લેતા તે નીચે પટકાયો હતો. આ સમગ્ર બનાવમાં બાઈકચાલક નીચે પટકાતા તેનું મોત નીપજ્યું હતું.

આ બનાવની જાણ થતાં સ્થાનિક પોલીસ અને ટ્રાફિક પોલીસની ટીમ બનાવના સ્થળે પહોંચી હતી. સૂત્રો પાસેથી મળતી માહિતી પ્રમાણે અકસ્માત થયો તે સમયે બસની સ્પીડ વધારે હતી. પોલીસે અકસ્માત સર્જી ફરાર ખાનગી બસના ચાલક સામે ગુનો નોંધી વધુ તપાસ હાથ ધરી છે.