રિપોર્ટ@સુરત: આઠ કેરેટના લેબગ્રોન ડાયમંડ પર વેપારીએ વડાપ્રધાન નરેન્દ્ર મોદીની છબી બનાવી, PM મોદીને ભેટ અપાશે

અટલ સમાચાર ડોટ કોમ, ડેસ્ક 

આઠ કેરેટના લેબગ્રોન ડાયમંડ પર સુરતના એક ડાયમંડ વેપારીએ વડાપ્રધાન નરેન્દ્ર મોદીની છબી બનાવી છે. આ ડાયમંડની કિંમત લાખોમાં હોવાનું વેપારીએ જણાવ્યું છે. આ ડાયમંડને ખાસ વડાપ્રધાન નરેન્દ્ર મોદીને ઉપહાર તરીકે આપવા માટે બનાવવામાં આવ્યો છે. સુરત ચેમ્બર ઓફ કોમર્સના ઇન્ટરનેશનલ કન્વેન્શન હોલમાં સુરત ડાયમંડ એસોસિએશન દ્વારા લુઝ ડાયમંડનું એક ખાસ એક્ઝિબિશનનું આયોજન કરવામાં આવ્યું છે. આ એક્ઝિબિશનમાં આકર્ષણનું કેન્દ્ર એક ખાસ ઇકોફ્રેન્ડલી ડાયમંડ લેબગ્રોન છે, જેની ઉપર વડાપ્રધાન નરેન્દ્ર મોદીની છબી કંડારવામાં આવી છે. વડાપ્રધાનની છબી સ્પષ્ટ પણે જોવા મળે છે. લેબમાં તૈયાર થયેલ આ ડાયમંડ પહેલા 40 કેરેટનું હતું, જેને આકાર આપીને વડાપ્રધાન નરેન્દ્ર મોદીની છબી લેસરથી બનાવીને આઠ કેરેટ કરવામાં આવ્યું છે. આ ખાસ પ્રકારનો ડાયમંડ બનાવવામાં કંપની બે વખત નિષ્ફળતા મળી હતી અને ત્રીજી વખત આ ખાસ ડાયમંડ તૈયાર કરવામાં સફળતા મળી છે.

હીરા બનાવનાર વેપારી સુથાર કિરણે જણાવ્યું હતું કે, જે ડાયમંડ અમે બનાવ્યું છે, તેનું કાચું વજન 40 કેરેટ હતું. અત્યારે ડાયમંડનું પોલિસ વેટ આઠ કેરેટ છે. એની પાછળ અમારે બહુ મહેનત લાગી છે. 20થી 25 જેટલા વર્કરોએ કામ કર્યું છે. ડાયમંડ સંપૂર્ણ બનાવવામાં પણ 25 દિવસ જેટલો સમય લાગ્યો છે. આ ડાયમંડ બનાવવામાં બે વખત નિષ્ફળતા મળી હતી, જેનો લોસ પણ આવ્યો છે.

વડાપ્રધાન પ્રત્યેના પ્રેમને કારણે આખરે ત્રીજી વખત અમને આ ડાયમંડ તૈયાર કરવામાં સફળતા મળી છે. અમારું લેબગ્રોન ડાયમંડ છે, જે ઇકો ફ્રેન્ડલી છે. આ ડાયમંડ મેડ ઇન ઇન્ડિયા અને મેક ઇન ઇન્ડિયા છે. જે રો મટિરિયલ આવે છે, તે પણ ઇન્ડિયામાં જ બને છે. પોલીશ પણ અમે ઇન્ડિયામાં જ કરીએ છીએ. વડાપ્રધાન નરેન્દ્ર મોદીનું જે ઇકો ફ્રેન્ડલી મિશન છે, જેના કારણે અમે મોદીજીની છબી આ હીરામાં દર્શાવી છે. આ ડાયમંડ અમે ઉપહાર તરીકે વડાપ્રધાન નરેન્દ્ર મોદીને આપીશું.

તેઓએ વધુમાં જણાવ્યું હતું કે, લેબગ્રોન ડાયમંડમાં વડાપ્રધાન નરેન્દ્ર મોદીની છબી લેસર માર્કિંગથી કરવામાં આવી છે. જેમાં ખાસ તકેદારી રાખવામાં આવતી હોય છે. અગાઉ જે બે ડાયમંડ નિષ્ફળ રહ્યા તે લેસર માર્કિંગના સમયે જ નિષ્ફળ રહ્યા હતા. જ્યારે આ રફ ડાયમંડ હતું, ત્યારે તેની કિંમત આશરે ચાર લાખ રૂપિયા હતી. હવે એની કિંમત વધી છે, પરંતુ કિંમત કેટલી છે એ અમે નથી કહેવા માંગતા. કારણ કે, અમારી માટે અનમોલ છે અને આ અમે વડાપ્રધાન નરેન્દ્ર મોદીને આપવા માટે બનાવી છે.