રિપોર્ટ@અમદાવાદ: ઘરમાંથી નકલી દારૂની ફેક્ટરી ઝડપાઈ, જાણો સમગ્ર મામલો

અટલ સમાચાર ડોટ કોમ, ડેસ્ક 

હાલમાં દારૂના કેસો ખુબજ વધી ગયા છે. અમદાવાદના ઘરમાંથી નકલી દારૂની ફેક્ટરી ઝડપાઈ છે.સસ્તો દારૂ, પાણી અને ફ્લેવરને મિક્સ કરીને બ્રોન્ડેડ દારૂની બોટલમાં ભરીને વેચવાનો અમદાવાદના શાહપુરમાં પર્દાફાશ થયો છે. મકાનમાં ચાલતી નકલી દારૂની ફેક્ટરી પર પોલીસ કમિશનરની PCB સ્ક્વોર્ડે દરોડો પાડી ચાર આરોપીને ઝડપી લીધા હતા. આ કૌભાંડનો મુખ્ય સૂત્રધાર મંગો ચૌહાણ છે. જેના મકાનમાં તેણે ચારેય મિત્રને નોકરીએ રાખ્યા હતા. જેમાંથી એક સંચાલક, સસ્તો દારૂ લાવનારને અને અન્ય બેને દારૂની ડિલિવરી માટે પણ રૂપિયા આપતો હતો. આરોપીઓ ડિમાન્ડ પ્રમાણે આગળના દિવસે દારૂ બનાવતા હતા અને બ્રાન્ડેડ બોટલના જેટલા ભાવ હોય એ ભાવે જ સસ્તો દારૂ પધરાવી દેતા હતા.

ASIએ જણાવ્યું હતું કે, બ્રાન્ડેડ દારૂની બોટલનો કોઈ ફિક્સ ભાવ નથી હોતો. પરંતુ 2000થી લઈ 5000 રૂપિયાના ભાવે આ બોટલનું વેચાણ કરતા હતા.

PCB સ્ક્વોડના PI જે.પી.જાડેજા અને ટીમને બાતમી મળી હતી. જેના આધારે PCBની ટીમે શહેરના શાહપુર વિસ્તારમાં હલીમની ખડકી પાસે મોઢાની પોળમાં વિકી ઉર્ફે મંગો ચૌહાણ નામના શખસના ઘરે રેડ કરી હતી. પોલીસે જ્યારે રેડ કરી તો ત્યાં ચાર લોકો મળી આવ્યા હતા. જે ચારેયના નામ મનદીપ ભાવસાર, કૈલાશ બોડાણા, દેવ પટેલ અને દેવાંગ જાની હોવાનું સામે આવ્યું હતું. ચારેય આરોપીઓ સસ્તી વિદેશી દારૂની બોટલમાંથી બ્રાન્ડેડ દારૂની ખાલી બોટલમાં ભરતા હતા.

આરોપીઓની પૂછપરછમાં સામે આવ્યું કે, વિકી ઉર્ફે મંગો ચૌહાણ દારૂનો ધંધો કરે છે. ચારેય તેના મિત્રો છે અને તેમને ત્યાં નોકરી કરે છે. મનદીપ ભાવસારને આ ધંધાનું સંચાલન કરવા આપ્યું હતું. જેને પગાર તરીકે ₹ 35,000 આપે છે. જ્યારે કૈલાશ બોડાણા સસ્તો વિદેશી દારૂનો જથ્થો અને ખાલી બોટલ લઈને આપે છે, જેના તેને દસ હજાર રૂપિયા મળે છે. અન્ય બે દેવ પટેલ અને દેવાંગ જાની બ્રાન્ડેડ વિદેશી દારૂની બોટલની ડિલિવરી કરવા જાય છે જેને રોજના પગાર પેટે ₹200 આપે છે.

PCB પીઆઈ જે.પી જાડેજાએ જણાવ્યું હતું કે, ભંગારમાંથી બોટલ ખરીદીને લાવવામાં આવતી હતી. સ્ટીકર પણ ખરીદી લેવામાં આવતા હતા. જ્યારે કોઈપણ વ્યક્તિ બ્રાન્ડેડ દારૂની ડિમાન્ડ કરે તો તેઓ આગલા દિવસે દારૂ બનાવી અને તૈયાર કરી દેતા હતા. કોઈપણ સસ્તો દારૂ લાવી અને પાણીમાં ફ્લેવર નાખી મિક્સ કરી અસલી લાગે તે પ્રમાણેનો દારૂ બનાવી બોટલમાં ભરતા હતા. બ્રાન્ડેડ ભાવ જેટલો હતો એટલા જ ભાવમાં વેચતા હતા. જે ફ્લેવરનો ઉપયોગ કરવામાં આવતો તેની પોલીસ દ્વારા તપાસ કરવામાં આવી રહી છે અન્ય કોઈ કેમિકલનો ઉપયોગ થતો હતો કે કેમ તેની પણ તપાસ હાલમાં ચાલુ છે.

આરોપીઓની પૂછપરછ અને ઘરમાં તપાસ કરતા PCBએ સસ્તા વિદેશી દારૂની બોટલ, બ્રાન્ડેડ દારૂની ખાલી બોટલ, હેર ડ્રાયર મશીન અને લાલ કલરનું પ્રવાહી મળી આવ્યું હતું. એટલું જ નહીં દારૂ ભરેલા પ્લાસ્ટિકના કેરબા પણ જપ્ત કરવામાં આવ્યા હતા. ભારતીય બનાવટની વિદેશી દારુની 227 બોટલ કબજે કરવામાં આવી છે. એ સાથે 1,56,410 રૂપિયાનો મુદામાલ જપ્ત કર્યો છે. ચાર આરોપીની ધરપકડ કરવામાં આવી છે. મુખ્ય સૂત્રધાર વિકી ઉર્ફે મંગાની શોધખોળ હાથ ધરવામાં આવી છે. શાહપુર પોલીસની જાણ બહાર પોલીસ કમિશનરની PCB સ્ક્વોડે દરોડા પાડી સમગ્ર કૌભાંડ ઝડપી પાડ્યું છે.

રાજસ્થાનના ઉદેપુરથી ટ્રાવેલ્સમાં ગેરકાયદે વિદેશી દારૂ લાવી શહેરકોટડાના ખુલ્લા પ્લોટમાં ઉતારતા સમયે PCBએ દરોડો પાડ્યો હતો. દોલત નામના આરોપી માટે ડ્રાઇવર મોહસીન શેખ દારૂ લાવતો હતો. પોલીસે ₹ 3,78,048નો દારૂ, ટેમ્પો અને બાઈક મળી 26,91,398નો મુદ્દામાલ જપ્ત કરી બે આરોપીની ધરપકડ કરી હતી.