રિપોર્ટ@ગુજરાત: ફ્લેટના છઠ્ઠા માળથી નીચે પટકાતાં યુવતીનું મોત, અકસ્માત કે આત્મહત્યા ?

અટલ સમાચાર ડોટ કોમ, ડેસ્ક 

યુવતીનું સુભાષનગર વિસ્તારની વી.પી. સોસાયટીના ફ્લેટના છઠ્ઠા માળની બાલ્કનીમાંથી નીચે પટકાતાં મોત થયું હતું. ઈજાગ્રસ્ત યુવતીને હોસ્પિટલમાં ખસેડાતા સારવાર દરમિયાન તેનું મોત થયુ હતું. આ ઘટના પાર્કિંગ વિસ્તારના CCTVમાં કેદ થઈ હતી, જેના કારણે પોલીસે આ શંકાસ્પદ ઘટના અકસ્માત છે કે આત્મહત્યા એ જાણવા તપાસ શરૂ કરી છે.

સુરતના કાપોદ્રામાં સ્થિત રામ કૃપા સોસાયટીમાં રહેતી જાનવી રમેશભાઈ સગર તાજેતરમાં દિવાળી પર્વ અન્વયે ભાવનગર શહેરના સુભાષનગર સ્થિત વીપી સોસાયટી પાસે આવેલા પ્રધાનમંત્રી આવાસ યોજનામાં રહેતા તેમના કોઈ સંબંધીના ઘરે દિવાળી વેકેશન મનાવવા આવી હતી. આ દરમિયાન ગત રાત્રિના સમયે ઈ વિંગના છઠ્ઠા માળે આવેલી બાલ્કનીમાંથી યુવતી નીચે પટકાતાં ઈજાગ્રસ્ત હાલતમાં સારવાર અર્થે સર ટી હોસ્પિટલમાં ખસેડવામાં આવી હતી, જ્યાં ટૂંકી સારવાર દરમિયાન તેનું મોત થયું હતું.

આ ઘટના આવાસ યોજનાના પાર્કિંગમાં લગાવેલા CCTV કેમેરામાં કેદ થઈ હતી. આ બનાવની જાણ ઘોઘા રોડ પોલીસને થતાં પોલીસ કાફલો ઘટનાસ્થળે દોડી આવ્યો હતો અને સમગ્ર બાબતને લઈને તપાસ શરૂ કરી છે.