રિપોર્ટ@ગુજરાત: 'ગુજરાત ભાડા વિધેયક'ના વિરોધમાં વકીલોની હડતાળ, જાણો સમગ્ર મામલો

અટલ સમાચાર ડોટ કોમ, ડેસ્ક 

ગુજરાત ભાડા વિધેયકના વિરોધમાં રાજ્યના વકીલો અચોક્કસ મુદ્દતની હડતાળ પર ઉતર્યા છે. રાજ્યના 182 વકીલ મંડળોની આગેવાનીમાં કોર્ટ પરિસરમાં વિરોધ પ્રદર્શન કરવામાં આવ્યું છે. આ પહેલા સતત ત્રણ દિવસ વિરોધ કરાયા બાદ પણ કોઈ ઉકેલ ન આવતા ગુજરાત બાર એસોસિએશને અચોક્કસ મુદતની હડતાળ પર જવા આહવાન કર્યું હતું.

ગુજરાત હાઇકોર્ટ એડવોકેટ એસોસિએશને પણ વકીલોને કોર્ટમાં ઉપસ્થિત ન રહેવા આહવાન કર્યું હતું. જેને પગલે હાઇકોર્ટમાં વકીલોને એન્ટર થવાનો ગેટ બંધ કરવામાં આવ્યો હતો. વકીલો કામથી અળગા રહેતા ચાલી રહેલા કેસોને પણ અસર થઈ છે.

હાઇકોર્ટની એક પણ કોર્ટમાં ખાનગી વકીલો ઉપસ્થિત રહ્યા નહોતા.તમામ કોર્ટની ઓન ડાયસ કામગીરી પૂર્ણ થઈ ગઈ છે અને આજની મુદતો લંબાવી છે. આ ઉપરાંત અમદાવાદ સીટી સિવિલ એન્ડ સેશન્સ કોર્ટથી બાઇક રેલી યોજવામાં આવી હતી. આ રેલી અમદાવાદ મેટ્રો કોર્ટ, ઘી કાંટા થઈને ઇન્કમટેક્સ સુધી પહોંચી હતી. વિરોધ પ્રદર્શન દરમિયાન ઇન્કમટેક્સ સર્કલ નજીક સિટી સિવિલ એન્ડ સેશન્સ કોર્ટ બાર એસોસિએશનના પ્રમુખ જગત ચોક્સીની તબિયત લથડી હતી.

ગુજરાત હાઇકોર્ટ એડવોકેટ એસોસિએશનના પ્રમુખ યતીન ઓઝાએ કહ્યું કે, ગુજરાત હાઇકોર્ટ બાર એસોસિએશન દ્વારા બે દિવસ માટે કામકાજથી દૂર રહેવાનો નિર્ણય કરવામાં આવ્યો છે અમે ત્રીજા દિવસથી કામ શરુ કરીશું. મારો વ્યક્તિગત મત એવો છે કે, આ કાયદો બિલ્ડરો અને ઉચ્ચ અધિકારીઓના લાભાર્થે લાવવામાં આવ્યો છે. વકીલ એક હશે તો કોઈ કાયદો કે એક્શન હરાવી શકશે નહીં. પ્રજા પણ જોશે ને કે સરકાર કેવા કાયદા લાવે છે જેના કારણે તેમને ભોગવવું પડે છે. ગુજરાત વિધાનસભા લાવી એવો કાયદો નોર્થ કોરિયામાં ન આવી શકે. કોંગ્રેસ-ભાજપના બધાએ એક અપવાદ સિવાય તાળીઓ પાડી હતી. ખાલી કોંગ્રેસના એક માત્ર ધારાસભ્ય કિરીટ પટેલે વિરોધ કર્યો હતો.

હસમુખ ભટ્ટે જણાવ્યું કે,વડોદરા વકીલ મંડળના તમામ વકીલોની સ્પષ્ટ માગણી છે કે રાજ્ય સરકારે રાજ્યપાલને મંજૂરી માટે મોકલેલો ખરડો પહેલાં પરત ખેંચવો જોઈએ અને તેમાં જરૂરી સુધારા કરવા જોઈએ, તે પછી જ આંદોલન પાછું ખેંચવાનો વિચાર કરવો જોઈએ. ગુજરાત બાર કાઉન્સિલ અને હાઈકોર્ટ કાયદાની ઊંડી સમજ ધરાવે છે, તેથી તેમની સાથે યોગ્ય ચર્ચા કર્યા વગર જો ગુજરાત બાર કાઉન્સિલ કોઈ સમાધાન કરશે, તો વડોદરા વકીલ મંડળ તેને માન્ય રાખશે નહીં.

આ મામલે નાયબ મુખ્યમંત્રી હર્ષ સંઘવીની અધ્યક્ષતામાં એડવોકેટ જનરલ કમલ ત્રિવેદી તથા બાર કાઉન્સિલના સભ્યો સાથે વિડિયો કોન્ફરન્સ યોજવામાં આવી હતી. બેઠક દરમિયાન ખાસ કરીને ભાડૂઆત અને મકાનમાલિક વચ્ચેના વિવાદોના નિવારણની સત્તા સિવિલ કોર્ટ પાસેથી લઈને રેવન્યુ અધિકારીઓને સોંપવાની જોગવાઈ સામે કાનૂની અને વ્યવહારુ પ્રશ્નો રજૂ કરવામાં આવ્યા હતા. નાયબ મુખ્યમંત્રીએ તમામ રજૂઆતો સાંભળીને સમગ્ર મુદ્દે યોગ્ય વિચારણા કરવા સમિતિ બનાવી યોગ્ય નિરાકરણ લાવવાની ખાતરી આપી છે.

આ વિવાદના ઉકેલ માટે 6 ઓક્ટોબરે એક મહત્વપૂર્ણ બેઠકનું આયોજન કરવામાં આવ્યું છે. જેમાં બાર કાઉન્સિલ ઓફ ગુજરાતના સભ્યો, અમદાવાદ સ્મોલ કોઝ તેમજ સિટી સિવિલ કોર્ટના વકીલ મંડળના હોદ્દેદારો, શહેરી વિકાસ વિભાગ અને કાયદા વિભાગના ઉચ્ચ અધિકારીઓ ઉપસ્થિત રહેશે. આ બેઠકમાં વિધેયકની તમામ વિવાદિત જોગવાઈઓ અને મળેલી રજૂઆતો પર વિગતવાર ચર્ચા-વિચારણા કરવામાં આવશે, જેથી તમામ હિતધારકોના હિતને ધ્યાનમાં રાખીને યોગ્ય નિર્ણય લઈ શકાય.

નવા વિધેયક અનુસાર, ભાડા કરાર અને તેનાથી ઊભા થતા વિવાદોના ઉકેલ માટે સિવિલ કોર્ટ કે સ્મોલ કોઝ કોર્ટની જગ્યાએ વહીવટી તંત્રના અધિકારીઓ (જેમ કે નાયબ મામલતદાર, ડેપ્યુટી કલેક્ટર કે આસિસ્ટન્ટ મ્યુનિસિપલ કમિશનર) નિર્ણય લેશે.

નવા ભાડા અધિનિયનને લઈને વકીલોની રોજગારી અને કેસની ન્યાયિક પ્રક્રિયા પર અસરને લઈને વકીલો વિરોધ કરી રહ્યા છે. વકીલો અને એસોસિએશન જૂનો કાયદો હતો તે જ યથાવત રાખવાની માગ કરી રહ્યા છે.