રિપોર્ટ@જૂનાગઢ: નકલી બીડીનું મોટું કૌભાંડ સામે આવ્યું, પોલીસે ₹3.12 લાખના મુદ્દામાલ સાથે એક શખ્સને દબોચ્યો
અટલ સમાચાર ડોટ કોમ, ડેસ્ક
નકલી બીડીનું મોટું કૌભાંડ સામે આવ્યું છે. જૂનાગઢના કેશોદ પાસે પોલીસે ₹3.12 લાખના મુદ્દામાલ સાથે એક શખ્સને દબોચી લીધો છે. આ ઘટનાએ સાબિત કરી દીધું છે કે ઠગબાજો હવે કોઈ પણ ક્ષેત્ર છોડવા તૈયાર નથી.
આ સમગ્ર કૌભાંડ ત્યારે પ્રકાશમાં આવ્યું જ્યારે 'સાબળે વાધીરે એન્ડ કંપની'ના જાગૃત કર્મચારીઓએ શંકાસ્પદ હલચલ નોંધી હતી. એક સફેદ ઇકો કારમાં નામાંકિત કંપનીઓના નામે નકલી બીડીનો જથ્થો લઈ જવામાં આવી રહ્યો હોવાની બાતમી મળતા, કંપનીના ફિલ્ડ ઓફિસર જીતેન્દ્રભાઈ જેઠવાએ પોલીસને સાથે રાખી વોચ ગોઠવી હતી. વેરાવળ રોડ પર તોરલ હોટેલ પાસે કારને આંતરીને તપાસ કરતા તેમાંથી નકલી બીડીના કાર્ટન મળી આવ્યા હતા.
પોલીસે આ કાર્યવાહી દરમિયાન રાજકમલ બીડીના 107 પેકેટ, સાબળે બીડીના 136 પેકેટ, ઇકો કાર અને મોબાઈલ સહિત કુલ ₹3,12,298નો મુદ્દામાલ જપ્ત કર્યો હતો. આ મામલે પોલીસે કોડીનારના એક્તા ચોક વિસ્તારમાં રહેતા કિરણ લક્ષ્મણભાઈ સોલંકીની ધરપકડ કરી છે. પ્રાથમિક પૂછપરછમાં બહાર આવ્યું છે કે, આ નકલી માલ અમરેલીના ઈરફાન પઠાણ પાસેથી મેળવવામાં આવ્યો હતો.
કંપનીના લોગોવાળા બનાવટી રેપર છાપી તેમાં હલકી ગુણવત્તાની બીડી ભરીને અસલી તરીકે બજારમાં પધરાવવામાં આવતી હતી. ખાસ કરીને સૌરાષ્ટ્રના ગ્રામ્ય વિસ્તારોમાં ભોળા વેપારીઓને વધુ નફાની લાલચ આપી આ નકલી જથ્થો વેચવામાં આવતો હતો. પેકેટના પ્રિન્ટિંગ અને કાગળની ગુણવત્તામાં તફાવત હોવા છતાં સામાન્ય માણસ તેને સહેલાઈથી ઓળખી શકે તેમ નહોતું.
નકલી બીડીમાં વપરાતા નબળા તમાકુ કે અન્ય હાનિકારક પદાર્થો ગંભીર બીમારીઓને નોતરી શકે છે. પોલીસ હવે આ નેટવર્કના મૂળ સુધી પહોંચવા તપાસ કરી રહી છે કે આ નકલી રેપર ક્યાં છાપવામાં આવતા હતા અને આમાં બીજા કેટલા શખ્સો સંડોવાયેલા છે. ગ્રાહકોને અપીલ કરવામાં આવી છે કે, બજાર ભાવ કરતા વધુ સસ્તી મળતી વસ્તુઓ લેતી વખતે સાવચેતી રાખવી.
