રિપોર્ટ@અમરેલી: એકસાથે 9 સાવજ શેરીમાં દેખાતા સ્થાનિકોમાં ભયનો માહોલ

અટલ સમાચાર ડોટ કોમ, ડેસ્ક 

અમરેલી જિલ્લાના લોકોમાં ભયનો માહોલ જોવા મળી રહ્યો છે.એકસાથે 9 સાવજ શેરીમાં દેખાયા હતા.  અમરેલીના રાજુલા તાલુકાના કોવાયા ગામમાં એકસાથે 9 સાવજ શેરીમાં દેખાયા હતા. શિકારની શોધમાં ગામમાં પ્રવેશેલા આ સિંહોનો વીડિયો વાઇરલ થયો હતો.  

વાઇરલ થયેલા વીડિયોમાં સ્પષ્ટપણે જોઈ શકાય છે કે નવ સિંહોનું ટોળું ગામની શેરીઓમાં શ્વાનની માફક આંટાફેરા કરી રહ્યું હતું. એક દુકાન નજીકથી પણ એ પસાર થયા હતા, જ્યાં દુકાનદાર હાજર હતો. આ દૃશ્યો મોબાઈલના કેમરામાં કેદ થયાં હતાં.

રાજુલા-પીપાવાવ કોસ્ટલ બેલ્ટ વિસ્તારમાં સિંહોની સંખ્યામાં સતત વધારો થઈ રહ્યો છે. આ કારણે સિંહો હવે રહેણાક વિસ્તારો તરફ વળી રહ્યા છે, જે અહીં રોજિંદી ઘટના બની ગઈ છે. અમરેલી જિલ્લામાં સિંહોની વસતિ સૌથી વધુ છે, ખાસ કરીને રાજુલા, જાફરાબાદ અને પીપાવાવ પોર્ટના દરિયાઈ કોસ્ટલ બેલ્ટ વિસ્તારમાં તેમનો વસવાટ વધુ જોવા મળે છે. માઈન્સ વિસ્તાર, ઉદ્યોગો અને જેટી વિસ્તારની નજીક પણ તેઓ માનવ વસાહતો વચ્ચે સારી રીતે વસવાટ કરી રહ્યા છે.